ەلىمىزدە قىركۇيەك ايىنىڭ ەكىنشى جەكسەنبىسى «وتباسى» كۇنى رەتىندە بەلگىلىنگەن. 4 جىلدان بەرى اتالىپ كەلە جاتقان كۇننىڭ ءداستۇرلى شاراسى رەسپۋبليكالىق «مەرەيلى وتباسى» بايقاۋى بيىل دا جالعاسىن تاپتى. بايقاۋ 16 قىركۇيەكتە «قازاقستان» وكز-دە وتەتىن  سالتاناتتى راسىممەن قورىتىندىلانادى، دەپ حابارلايدى Qamshy.kz  اقپارات اگەنتتىگى.

بۇل تۋرالى بۇگىن ورتالىق كوممۋنيكاسيالار قىزمەتىندە بايقاۋ ۇيىمداستىرۋشىلارىمەن وتكەن باسپا ءسوز كونفەرەنسيادا بەلگىلى بولدى. «مەرەيلى وتباسى» ۇلتتىق كونكۋرسىن وتكىزۋ بويىنشا قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا وتكىزىپ كەلەدى. بيىلعى جىلى كونكۋرسقا 2879 وتباسى قاتىسىپ، ولاردىڭ ىشىندە 1041 وتباسى كوپ بالالى ەكەنى انىقتالعان.  سونىمەن قاتار، وتكەن جىلمەن سالىستىرعاندا ەڭبەككەرلەر اۋلەتتەرى وكىلدەرىنەن قۇرالعان وتباسىلاردىڭ سانى 6،8%-عا ءوسىپ، بيىل 516 وتباسى قاتىسقان.

ۇلتتىق كوميسسيا ءتورايىمىنىڭ ورىنباسارى ءلاززات سۇلەيمەن اتاپ وتكەندەي، مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا قوعامنىڭ رۋحاني وي-ساناسىن جاڭعىرتۋدىڭ نەگىزگى باعدارلارى ايقىندالعان. بۇل باعىتتاعى وتباسى ينستيتۋتىنىڭ ءرولى وتە جوعارى.

«مەرەيلى وتباسى» كونكۋرسىنىڭ فينالدىق كەزەڭىندە جەڭىمپازدى انىقتاۋ ءۇشىن ەلدىڭ بارلىق ازاماتتارى kaztube.kz سايتىندا جانە سمس-حابارلامالار ارقىلى ينتەراكتيۆتى داۋىس بەرۋ ارقىلى تىكەلەي قاتىسا الاتىندىعىن ەسكە سالامىز. ال جەڭىمپاز وتباسىعا «مەرەيلى وتباسى» ۇلتتىق كونكۋرسىنىڭ لاۋرەاتى اتاعى بەرىلەدى.

سونىمەن قاتار، ورتالىق كوممۋنيكاسيالار قىزمەتىندە وتكەن باسپا ءسوز كونفەرەنسياعا قاتىسقان ۇلتتىق كوميسسيانىڭ مۇشەسى، ق ر پارلامەنتى ءماجىلىسىنىڭ دەپۋتاتى باقىتبەك سماعۇل ۇلتتىق كوميسسيا اكەنىڭ بالا تاربيەسىندەگى ءرولىن كۇشەيتۋگە، وتباسى ينستيتۋتىن نىعايتۋعا جانە وتباسىلىق تاربيە ماسەلەلەرىنە قوعامنىڭ نازارىن اۋدارۋعا ەرەكشە كوڭىل ءبولىپ وتىرعانىن اتاپ ءوتتى.