شىعىس قازاقستان وبلىسىندا قارۋلانعان ادامدار جەكە ۇيگە قاراقشىلىق شابۋىل جاسادى. بەلگىسىزدەر وتاعاسىنا وق اتىپ، وتباسىنىڭ قالعان مۇشەلەرىن بايلاپ تاستاعان. وكىنىشكە قاراي، اۋىر جاراقات العان ەر ادام سول جەردە كوز جۇمعان. قاراقشىلار ۇيدەن ميلليون تەڭگەدەن اسا اقشانى الىپ كەتكەن، - دەپ حابارلايدى Qamshy.kz  اقپارات اگەنتتىگى Tengrinews.kz-كە سىلتەمە جاساي وتىرىپ.

«11 قىركۇيەككە قاراعان ءتۇنى اۋىلعا بىرەۋلەر شابۋىل جاساعان. بەلگىسىزدەر جەكە ۇيگە باسا كوكتەپ كىرىپ، ءۇيدىڭ يەسىنە وق اتىپ، جاراقاتتاعان. ەر ادام العان جاراقاتتارىنان وقيعا ورنىندا كوز جۇمعان، ال جاراقات العان ەكىنشى ەر ادام اۋرۋحاناعا جەتكىزىلگەن سوڭ كوز جۇمعان. قاسكويلەر ۇيدە بولعان ەكى ايەلدى بايلاپ تاستاپ، ميلليون تەڭگەدەن اسا اقشانى ۇرلاپ كەتىپ، وقيعا ورنىنان جاسىرىنعان»، - دەدى شقو ءىىد وكىلدەرى.

سونداي-اق، پوليسياداعىلار قىلمىستى اشۋ جانە كۇدىكتىلەردى ۇستاۋ ماقساتىندا ارنايى جەدەل-تەرگەۋ توبىنىڭ قۇرىلعانىن جانە ول توپتا شقو ءىىد قىزمەتكەرلەرى مەن كوكپەكتى اۋداندىق ءىىب قىزمەتكەرلەرى بار ەكەنىن ايتتى.

«جەدەل-ىزدەستىرۋ شارالارى بارىسىندا كوكپەكتى اۋدانىنىڭ ءۇش تۇرعىنى ۇستالدى. كەيىنىرەك ولار ۋاقىتشا ۇستاۋ يزولياتورىنا قامالدى»، - دەپ حابارلادى ءىىد وكىلدەرى.

قۇقىق قورعاۋ ورگاندارىنىڭ مالىمەتىنشە، قازىرگى ۋاقىتتا پوليسەيلەر ادام ءولتىرۋ جانە قاراقشىلىق دەرەكتەرى بويىنشا سوتقا دەيىنگى تەرگەۋ باستادى، قاجەتتى ساراپتامالار تاعايىندالدى.