ق ر ءدىن ىستەرى جانە ازاماتتىق قوعام مينيسترلىگىنىڭ جانىنداعى  جاستار ۇيىمدارىن دامىتۋ جونىندەگى ۇيلەستىرۋ كەڭەسىنىڭ وتىرىسى ءوتتى دەپ حابارلايدى Qamshy.kz اقپارات اگەنتتىگى. شاراعا ق ر ءدىن ىستەرى جانە ازاماتتىق قوعام مينيسترلىگىنىڭ ۆيسە-مينيسترى  ابزال نۇكەنوۆ، مەملەكەتتىك ورگانداردىڭ وكىلدەرى جانە رەسپۋبليكالىق جاستار ۇيىمدارىنىڭ باسشىلارى قاتىستى.

وتىرىس بارىسىندا قاتىسۋشىلارعا «قازاقستاننىڭ جاستار كونگرەسى» زتب اتقارۋشى ديرەكتورى ايدىن ءسابيتوۆ قازاقستان رەسپۋبليكاسى پرەزيدەنتى ن.ءا.نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىنا قولداۋ رەتىندە  قازاقستان جاستارىنىڭ ارنايى جاساعان ۇندەۋىن وقىپ بەردى. 

ۇندەۋدىڭ ءماتىنى:

«ءبىز، قازاقستان جاستارى، ۇلتتىق قۇندىلىقتار مەن تاريحىمىزدى دارىپتەيتىن، حالقىمىزدىڭ عاسىرلار بويى جالعاسىپ كەلە جاتقان ادامگەرشىلىك قاسيەتتەرىنە سۇيەنەتىن رۋحى بيىك ماڭگىلىك ەلدى قۇرۋ جولىندامىز. بۇل جولداعى باس مىندەتىمىز - ۇلتتىق ناقىشىمىزدى ساقتاي وتىرا زامانۋي تالاپتارعا ساي ءبىلىمدى جانە پروگرەسسيۆتى دامىعان ەل بولۋ.

ۇلتتىق قۇندىلىقتار ءارقاشان انا تىلدەن باستاۋ الادى. سوندىقتان ءتىل ماسەلەسى جىلدار بويى ەڭ وزەكتى ماسەلە پوزيسياسىن ساقتاپ كەلەدى.

ەلىمىزدىڭ جارقىن بولاشاعىن قۇرۋ جولىن جالعاستىراتىن ءبىز، قازاقستان جاستارى، لاتىن الىپبيىنە كوشۋ يدەياسىن قولدايتىنىمىز تۋرالى مالىمدەيمىز. سەبەبى، لاتىن ءالىپبيى قازاق دىبىستارىن ناقتىراق ايقىندايدى. كەزىندە «قازاق ءالىپبيىنىڭ اتاسى» اتانعان احمەت بايتۇرسىن ۇلىنىڭ دا لاتىن ءالىپبيىن قولدانىسقا ەنگىزگەنى دە سوندىقتان.

قازىرگى تاڭدا الەم ەلدەرىنىڭ باسىم بولىگى تەك قانا لاتىن گرافيكاسىن قولدانادى. ءتۇبىمىز ءبىر تۇركى ەلدەرىنىڭ دە كوبىسى دەرلىك لاتىن الىپبيىمەن وقيدى. تۇركى تىلدەرىنىڭ ەرەكشەلىگىنە ساي دىبىستىق ۇقساستىقتار دا وسىنىڭ دالەلى.

لاتىن گرافيكاسىنا كوشۋدىڭ جاستارعا ىڭعايلى تاعى ءبىر سەبەبى – لاتىن ارىپتەرىنىڭ پراگماتيكالىق ىڭعايلى بولۋى. الەمدەگى يننوۆاسيالىق جاڭاشىلدىقتاردىڭ بارلىعى ەڭ الدىمەن لاتىن گرافيكاسىندا شىعادى. ءبىراز ۋاقىت وتكەن سوڭ عانا، كيريلل الىپبيىنە كوشىرىلەدى.

لاتىن الىپبيىنە اۋىسۋ قادامى بىزگە ۇزاق مەرزىمدى كەلەشەكتە ەكونوميكالىق پايدا اكەلىپ قانا قويماي، لاتىندانعان ءونىمدى كيريلليساعا اۋدارۋعا جۇمسايتىن ۋاقىتىمىزدى ۇنەمدەۋگە مۇمكىندىك بەرەدى دەپ ويلايمىز.

رەسپۋبليكامىزدىڭ جاستارى مەن جاستار ۇيىمدارىنىڭ قاۋىمداستىعى اتىنان، قازاقستان جاستارى الەمگە مىقتى ءارى جاۋاپكەرشىلىگى جوعارى ءبىرتۇتاس ۇلتتى كورسەتۋگە دايىن ەكەنىن مالىمدەي وتىرا، قازاق ءتىلىنىڭ لاتىن الىپبيىنە اۋىسۋىن ءبىراۋىزدان قولدايدى!

بۇدان كەيىن، قاتىسۋشىلار جاريالانعان ۇندەۋگە قول قويۋ راسىمىنە قاتىستى.                      ق ر ءدىن ىستەرى جانە ازاماتتىق قوعام ۆيسە-مينيسترى ابزال نۇكەنوۆ ءوز كەزەگىندە  بۇگىنگى جاريالانعان ۇندەۋدىڭ ءماتىنى بارشا قازاقستان جاستارىنا جەتۋى-تيىس دەپ اتاپ ءوتتى.