ورتا سالماقتا WBA (Super)، IBO، WBC جانە IBF تۇجىرىمدارى بويىنشا الەم چەمپيونى قازاقستاندىق بوكسشى گەنناديي گولوۆكين (37-0، 33 كو) BoxNation باسىلىمىنا بەرگەن سۇحباتىندا 16 قىركۇيەكتە مەكسيكالىق ساۋل "كانەلو" الۆارەسپەن وتەتىن جەكپە-جەكتىڭ ناۋرىزدا امەريكالىق دەنيەل دجەيكوبسپەن وتكەن كەزدەسۋگە قاراعاندا وزگەشە بولاتىنىن ايتتى، - دەپ حابارلايدى Qamshy.kz اقپارات اگەنتتىگى  Vesti.kz سايتىنا سىلتەمە جاساپ.

گولوۆكين سپورتتىق مانسابىندا ءبىرىنشى رەت 12 راۋندتىق كەزدەسۋ وتكىزدى. تورەشىلەر ءبىراۋىزدان جەڭىستى قازاقستاندىققا بەردى. قازاقستاندىق بوكسشى "كانەلومەن" وتەتىن ەكپە-جەكتە مۇنداي سەناريي قايتالانبايتىنىن ايتادى. ول Big Drama Show ۇيىمداستىرىپ، قارسىلاسىن نوكاۋتقا ءتۇسىرۋدى جوسپارلاپ وتىرعانىن ايتتى.

"دجەيكوبس وتە جاقسى بوكسشى. ماعان 12 راۋند كەرەك بولدى، سەبەبى مەن كەلەسى قارسىلاسىمنىڭ مىقتى بولارىن ءبىلدىم. مەن دايىنمىن. ءقازىر باسقا جاعداي. مەن "كانەلونى" بىلەمىن، ول مەنى بىلەدى. "كانەلو" مەن دجەيكوبستىڭ جۇدىرىقتاسۋ تاسىلدەرى مەن ستيلدەرى بولەك. بارلىعى شىنايى ءارى قىزىقتى"، - دەيدى ول.

ايتۋىنشا، "كانەلو" بۇقا سەكىلدى مىقتى.

"ول جاس ءارى اقىلدى جىگىت. دەنيەل باسقا ساناتتىڭ بوكسشىسى بولاتىن. مەنىڭشە، الۆارەس ەكەۋىمىزدىڭ جەكپە-جەگىمىز تورەشىلەر شەشىم شىعارعانعا دەيىن جەتپەيدى، سەبەبى ءبىز ءبىر-بىرىمىزدى جاقسى بىلەمىز. ونىڭ 100 پايىزعا دايىن ەكەنىن بىلەمىن، ءبىزدى ناعىز شايقاس كۇتىپ تۇر. جەڭىمپاز pound-for-pound نۇسقاسى بويىنشا ءبىرىنشى ورىندى يەلەنەدى. Big Drama Show بولادى، بارلىعى وسىنى قالاپ وتىر. بۇل "كانەلو" مەن چاۆەس اراسىندا وتكەن فەيك كەزدەسۋ ەمەس. بىزدىكى ناعىز جەكپە-جەك"، - دەدى گولوۆكين.

ايتا كەتەيىك، گولوۆكين - "كانەلو" جەكپە-جەگى 16 قىركۇيەك كۇنى لاس-ۆەگاستاعى (اقش، نيەۆادا) T-Mobile Arena ارەناسىندا وتەدى.

ساۋل كانەلو الۆارەسكە قارسى جەكپە-جەكتە گەنناديي گولوۆكين ورتا سالماقتا WBC، WBA (Super)، IBF جانە IBO چەمپيوندىق اتاقتارىن قورعايدى. مەكسيكالىق The Ring جۋرنالىنىڭ بەلبەۋىن باسكە تىگەدى.