«ەگەمەن قازاقستان» گازەتىندە جاريالانعان «بولاشاققا باعدار: رۋحاني جاڭعىرۋ» اتتى باعدارلامالىق ماقالاڭىزدى قوعام قازاق ەلىنىڭ رۋحاني دامۋى مەن جاڭارۋىنىڭ تۇعىرناماسى رەتىندە قابىلدادى، دالىرەك ايتساق، ۇلتتىق سانامىز بەن رۋحاني ورەمىزدى ءدۇر سىلكىندىرەتىن، ۇلت بولىپ ۇيىسۋعا، ەل بولىپ بەلدى بەكەم بۋۋعا، ۇلتتىق نامىستى تۋ ەتۋگە باستايتىن تاريحي قادام رەتىندە قابىلدادى دەسەك، بۇل ارتىق ايتقاندىق ەمەس.
ۇلتتىڭ رۋحاني جاڭعىرۋىنا باستايتىن ناقتى قادامداردىڭ الدىڭعى قاتارىنا قازاق ءتىلى جازۋىن لاتىن جازۋىنا كوشىرۋ ماسەلەسىنىڭ قويىلىپ، ناقتى مىندەتتەر بەلگىلەنۋى دە ۇلتتىق سانانى سىلكىنتۋ، جاڭعىرتۋ مىندەتىنەن تۋىنداپ وتىرعاندىعى انىق. ماڭىزدىلىعى، قاجەتتىلىگى جاعىنان، مۇمكىن ءتىلدىڭ عانا ەمەس، تۇتاس قازاق ۇلتىنىڭ بۇگىنى عانا ەمەس، بولاشاعى ءۇشىن دە بىرەگەي، باستى ماسەلە - ۇلتتىق ءالىپبي تۋرالى ماقالادا ايتىلعان تياناقتى وي - قوعامدا ۇلكەن قىزىعۋشىلىق تۋدىردى. ويتكەنى ۇلتتىق ءالىپبي تاقىرىبى ۇلت زيالىلارىنىڭ كوپتەن كۇتكەن اڭگىمەسى ەدى.
جازۋ جۇيەسىندە بولاتىن بۇل وزگەرىستەر «ۇلت ءۇشىن دەگەن ۇلى ءىس» (ا.بايتۇرسىن ۇلى) ەكەندىگى ءسوزسىز. باستى ماسەلە انىق - قازىرگى قازاق جازۋىنا، ونىڭ ەملەسىنە وزگەرىستەردىڭ ءسوزسىز قاجەتتىگى. جاڭا ءالىپبي، ەڭ الدىمەن، قازاق ءتىلى بولاشاعى ءۇشىن، «قازاق ءتىلىن جاڭعىرتۋ ءۇشىن» كەرەك ەكەندىگىن قازاق قوعامى بۇگىندە انىق ءتۇسىندى جانە بۇل وزگەرىستەرگە دايىن.
سوندىقتان دا بارلىق باتىسقازاقستاندىق ءتىل جاناشىرلارى بۇل تاريحي باستاماعا تولىق قولداۋ بىلدىرۋدە، ءبىز قوعام بولىپ جان-جاقتى ساراپتاۋ مەن وي ەلەگىنەن وتكىزۋگە، قورىتىندى شىعارۋعا، بولاشاق مىندەتتەرىمىزدى ايقىنداپ، ناقتى ءىس-شارالار جوسپارىن جاساۋعا، «ۇلت ءۇشىن دەگەن ۇلى ىسكە» جۇمىلا كىرىسۋگە ءاردايىم دايىنبىز.
وسىلايشا، تاۋەلسىز قازاقستاننىڭ ەكونوميكاسىمەن بىرگە ۇلى رۋحاني قۇندىلىقتارى - ءتىل، مادەنيەت، ءبىلىم مەن عىلىم دا جاڭا كەزەڭدە ورلەۋ مەن دامۋدىڭ جاڭا ساتىسىنا كوتەرىلەتىنىنە كۇمان جوق.
بولات جەكسەنعالييەۆ
حالىقارالىق «قازاق ءتىلى» قوعامى» قوعامدىق بىرلەستىگى باتىس قازاقستان وبلىستىق فيليالىنىڭ ءتوراعاسى (ورال قالاسى)
