قىتايداعى قازاق بوكسشىلارىنىڭ ادىلەتسىز جەڭىلىسىنەن كەيىن، قىتايدىڭ بوكستان ۇلتتىق قۇراماسى تاراپ كەتتى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ. بۇعان دەيىن حابارلاعانىمىزداي، 75 كگ سالماقتاعى بوكسشى قىتايداعى قانداسىمىز توقتاربەك تاڭلاتحان ۇلى XIII كەزەكتى جازعى جالپى قىتايلىق سپارتاكياداسىنىڭ فينالىنا شىعىپ، اقتىق باسەكەدە حۋبەي پروۆينسياسىنىڭ سپورتشىسى ۆەن ينحاڭنان تورەشىلەر شەشىمىمەن جەڭىلىپ قالعان بولاتىن.
الايدا، سپورتشىنىڭ باپكەرلەرى نارازىلىق تانىتىپ، شاعىم تۇسىرگەن. قورتىندىسىندا تورەشىلەر شەشىمى وزگەرىپ، قانداسىمىز فينالعا جولداما العان. سونىمەن قاتار، 64 كگ سالماقتا بوكستاسقان ەرداۋلەت مەيرامبەك ۇلى شيرەك-فينالدا XII كەزەكتى سپارتاكيادا چەمپيونى ۆان گاڭمەن كەزدەسىپ، ەرداۋلەت ايقىن باسىمدىلىق كورسەتسە دە تورەشىلەر 4:1 ەسەبىمەن جەڭىستى قارسىلاسىنا بەردى. جارىستان كەيىن، تورەشىنىڭ شەشىمىنە قىتايلىق بوكس جانكۇيەرلەرى ءوز نارازىلىق ءبىلدىرىپ، جارىس قورتىندىسىن قايتا قاراۋدى تالاپ ەتتى.
جۇڭگو مەملەكەتتىك سپورت باس باسقارماسى 8 قىركۇيەك كۇنى قىتايدىڭ بوكستان ۇلتتىق قۇراماسىنىڭ تاراتىلعانى تۋرالى مالىمدەمە جاسادى. مالىمدەمەدە، وسى ەكى جارىستا ادىلەتسىز شەشىم جاساعان بارلىق تورەشىلەر جانە جاۋاپتى باسشىلاردىڭ قىزمەتى توقتاتىلعانى تۋرالى ايتىلعان. ايتا كەتەيىك، شىڭجاڭ-ۇيعىر اۆتونوميالىق ولكەسى قىتايدىڭ ەڭ ۇلكەن بوكس بازاسى. قازاقستاندىق تانىمال كاسىپقوي بوكسشى قانات يسلام وسى ءوڭىردىڭ قازاقتار شوعىرلانعان التاي ايماعى قابا اۋدانىندا دۇنيەگە كەلىپ، جاستايىنان شىڭجاڭ بوكس قۇراماسى ساپىندا ونەر كورسەتكەن. بۇل كۇندە شىڭجاڭ بوكسشىلارى جۇڭگو اتىنان حالىقارالىق باسەكەلەردە جانە وليمپيادا ويىندارىندا توپ جارىپ كەلەدى.
