«نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەد يندۋستريالدى-يننوۆاسيالىق دامۋدىڭ 2015-2019 جىلدارعا ارنالعان مەملەكەتتىك باعدارلاماسىن جۇزەگە اسىرۋ بارىسى جونىندە پارتيالىق تىڭداۋ وتكىزدى.

باعدارلاما اياسىندا تەك سوڭعى 7 جىلدىڭ ىشىندە ەلىمىزدە 500-گە جۋىق جاڭا ءونىم تۇرلەرىن ءوندىرۋ ءىسى قولعا الىنعان. بۇگىندە «نۇر وتان» پارتياسى ءوزىنىڭ سايلاۋالدى باعدارلاماسىندا ناقتى كورسەتىلگەن بازالىق سالالار مەن يننوۆاسيانى دامىتۋ مىندەتتەرىن جۇزەگە اسىرۋ باعىتىندا جۇيەلى جۇمىستار جۇرگىزۋدە. سونىڭ ناتيجەسىندە 2021 جىلى ەلىمىزدە ءتۇرلى-تۇستى مەتاللۋرگيا ەكسپورتى 20 پايىزعا وسەدى دەپ كوزدەلۋدە. سونداي-اق، مۇناي-گاز سالاسىندا باسەكەگە قابىلەتتىلىك ارتىپ، ەنەرگيامەن قامتاماسىز ەتەتىن كاسىپورىنداردىڭ اياسى كەڭەيمەك. بۇل مىندەتتەردىڭ بارلىعى 2015 جىلدان باستاپ ەكىنشى بەس جىلدىعى جۇزەگە اسىرىلىپ كەلە جاتقان يندۋستريالدى-يننوۆاسيالىق دامۋ مەملەكەتتىك باعدارلاماسىنا دا ەنگىزىلگەن.

باعدارلاما شەڭبەرىندەگى وسىنداي باسىمدىقتارعا توقتالىپ وتكەن مۇحتار قۇل-مۇحاممەد: «ەلباسىنىڭ تاپسىرماسىمەن يندۋستريالىق-يننوۆاسيالىق دامۋ باعدارلاماسى اياسىندا 1000-نان استام جاڭا كاسىپورىندار سالىندى. ونى جۇزەگە اسىرۋعا 5 تريلليون تەڭگەدەن استام قاراجات ءبولىندى. ەلىمىزگە بۇكىل دۇنيەجۇزىنە تانىمال اسا ءىرى كومپانيالار كەلىپ، ميللياردتاعان دوللار ينۆەستيسيا سالدى جانە ەڭ وزىق تەحنولوگيالاردى اكەلدى. ءدال وسى جاڭا كاسىپورىندار مۇناي باعاسى ءۇش ەسەگە تومەندەگەن كەزدە ەل ەكونوميكاسىنىڭ تۇراقتى دامۋىن قامتاماسىز ەتىپ وتىر»، – دەدى.

ءىس-شارا بارىسىندا ينۆەستيسيالار جانە دامۋ ءمينيسترى جەڭىس قاسىمبەك باعدارلاما اياسىندا اتقارىلعان جۇمىستار جونىندە بايانداما جاسادى. سونىمەن قاتار پارتيالىق تىڭداۋعا قاتىسقان ءماجىلىس دەپۋتاتتارى مينيسترگە وزدەرىن الاڭداتقان سۇراقتارىن قويىپ، ناقتى جاۋاپتار الدى.

بۇگىنگە دەيىن باعدارلاما بويىنشا ءتورت باستى ينديكاتوردىڭ ۇشەۋى جۇزەگە اسىرىلعان. ەلىمىزدە جاڭا ونەركاسىپتىك ونىمدەر ءوندىرىلىپ، زاماناۋي تەحنولوگيالار اكەلىندى جانە قوسىمشا جۇمىس ورىندارى اشىلدى. الايدا، بۇل جەتىستىكتەرگە توقمەيىلسۋگە بولمايتىنىن، قايتا بۇدان دا كۇردەلى جوبالاردى قولعا الىپ، باتىل قيمىلداۋىمىز كەرەكتىگىن ايتقان مۇحتار قۇل-مۇحاممەد: «نۇر وتان» پارتياسى ەلباسى تاپسىرمالارى مەن بارلىق پرەزيدەنتتىك باعدارلامالاردىڭ ورىندالۋىنا ەرەكشە پارتيالىق باقىلاۋ جۇرگىزۋدى جالعاستىرا بەرەدى»، – دەدى.