بيىلعى جىلى الاشوردا ۇكىمەتىنىڭ قۇرىلعانىنا 100 جىل، الاش ارىسى ەلدەس ومار ۇلىنىڭ تۋعانىنا 125 جىل تولىپ وتىر.  وسىدان بىرنەشە اي بۇرىن «Qzmshy.kz» اقپاراتتىق اگەنتتىگى  «الاش ارىسى ەلدەس ومار ۇلىنىڭ شىعارمالار جيناعىن شىعارۋ ءۇشىن قولداۋ قاجەت!» دەگەن ماقالا جاريالاپ،«ناۋرىزدىڭ 15-ىندە احمەت بايتۇرسىن ۇلىنىڭ ەڭبەكتەرىنە ارنالعان عىلىمي كونفەرەنسيادا احمەت بايتۇرسىنوۆ اتىنداعى قمۋ پروفەسسورى، جازۋشى، فيلولوگيا عىلىمدارىنىڭ كانديداتى اقىلبەك شاياحمەت قوستانايدان ارنايى كەلىپ بايتۇرسىنوۆ مۇراسى تۋرالى بايانداما جاسادى» - دەپ اتاپ كورسەتىپ، جازۋشى جيناقتاعان  كىتاپتان ۇزىندىلەر باسقان ەدى. سول يگى باستاما جالعاسىن تاۋىپ، قوستاناي وبلىسىنىڭ اكىمى ارحيمەد مۇحامبەتوۆتىڭ دەمەۋشىلىگىمەن استاناداعى «فوليانت» باسپاسىنان كورنەكتى مەملەكەت قايراتكەرىنىڭ شىعارمالار جيناعى قازاق جانە ورىس تىلدەرىندە مىڭ دانا تارالىممەن جارىق كوردى. كىتاپتى قۇراستىرعان عىلىم دوكتورى مارات شۋاقايەۆ پەن پروفەسسور اقىلبەك شاياحمەت.

الاش ارداقتىسى ەلدەس ومار ۇلىنىڭ شىعارمالار جيناعىنا ونىڭ قازاق جانە ورىس تىلدەرىندە جازىلعان شىعارمالارى ەنگىزىلدى. ءبىراق، عالىمنىڭ ەڭبەكتەرى بۇل كىتاپتا تۇگەل قامتىلماعان. كوپتەگەن تۋىندىلارى ءالى جيناستىرىلماعان نەمەسە اراب جانە لاتىن ارپىنەن كيريلل ارپىنە كوشىرىلمەگەن. بۇل تۋىندىلاردى مۇراعاتتان تاۋىپ، جاريالاۋ كەلەشەكتە عالىمداردىڭ ۇلەسىندە. ازىرشە قولدا بار شىعارمالار عانا وقىرماندار نازارىنا ۇسىنىلىپ وتىر. كىتاپ ادەبيەت زەرتتەۋشىلدەرىنە، ءتىلشى عالىمدارعا، الاش تاريحى مەن ادەبيەتىنە قىزىعۋشىلىق تانىتقان بارشا وقىرمانعا ارنالعان.

            ءتورت بولىمنەن تۇراتىن جيناقتان ەلدەس ومار ۇلىنىڭ ماقالالارى جانە باياندامالارىمەن، مۇراعاتتار ماتەريالدارىمەن، ەلدەس ومار ۇلى تۋرالى پىكىرلەرمەن جانە قۇجاتتارمەن تانىسۋعا بولادى.

كىتاپتا ماحمۇت قاشقاري اتىنداعى تۇركى الەمىنە سىڭىرگەن ەڭبەگى ءۇشىن حالىقارالىق سىيلىقتىڭ، «الاش» حالىقارالىق سىيلىعىنىڭ لاۋرەاتى اقىلبەك شاياحمەتتىڭ ءالعىسوزى بەرىلگەن.