قالا كۇنى قارساڭىندا الماتى تۇرعىندارى مەن قوناقتارىن وتە مازمۇندى مادەني-كوڭىلدى باعدارلامالار كۇتىپ تۇر، ولار: ءداستۇرلى «الماFest-2017» الما فەستيۆالى، كوپمىڭدىق «Open Air «Gakku داۋسى»، «الماتى ارەناداعى» «ەما-2017» مۋزىكا سىيلىعى جانە باسقالارى. 17 قىركۇيەككە دەيىن جۇرگىنشىگە باسىمدىق بەرەتىن پانفيلوۆ، جىبەك جولى، گوگول، كابانباي باتىر كوشەلەرىن قايتا جاساۋ جۇمىستارى اياقتالادى. جاقىندا عانا جاڭارعان «استانا» الاڭى، ناۋرىزباي اۋدانىنىڭ جاڭا اكىمشىلىك- ىسكەرلىك ورتالىعى، «Open Almaty» قالالىق قوعامدىق قابىلداۋ نىسانى اشىلعان بولاتىن. بۇل جايىندا Qamshy.kz اقپارات اگەنتتىگى الماتى قالاسى اكىمدىگىنىڭ باسپا ءسوز قىزمەتى مالىمەتىنە سۇيەنىپ حابارلايدى. 

15 قىركۇيەكتە ساعات 10.00-دەن باستاپ قالا تۇرعىندارى مەن قوناقتارى الماتى مۇراجايىندا «الماتى پەتەربورلىق سۋرەتشىلەر كوزىمەن» اتتى كورمەنى تاماشالاپ، پەتەربورلىق سۋرەتشىلەردىڭ تۋىندىلارىن كورە الادى. ءدال سول كۇنى ساعات 18:00-دە جامبىل اتىنداعى قازاق مەملەكەتتىك فيلارمونياسىندا ي.موريلەند پەن گ.ۇزەنبايەۆتىڭ فورتەپيانالىق دۋەت كەشى وتەدى، ال 19.30-دا م. لەرمونتوۆ اتىنداعى دراما تەاترىندا 85ء-شى مەرەيلى ماۋسىم باستالادى.

15، 16 قىركۇيەك كۇندەرى ساعات 19.00-دە اباي اتىنداعى ماتوب-تا كلاسسيكالىق ونەردى باعالايتىندار ءۇشىن الەمدىك بالەت كەشى كورەرمەندەرىن كۇتەدى. 16 قىركۇيەكتە زاماناۋي وتاندىق مۋزىكا اۋەسقويلارى ءۇشىن قازاقستاندىق «Gakku داۋسى» فەستيۆالى وتەدى.

قالا كۇنى - 17 قىركۇيەكتە ساعات 10-00 دە قازاقستان رەسپۋبليكاسىنىڭ تۇڭعىش پرەزيدەنتى اتىنداعى ساياباقتا جىل سايىن 200 مىڭعا دەيىن الماتى تۇرعىندارى مەن قوناقتارىن جينايتىن قالالىق ءداستۇرلى «الماFest-2017» الما فەستيۆالى وتەدى. فەستيۆال ماڭىندا 100 توننادان استام المانىڭ ءدامىن تاتىپ، ساتىپ الۋعا بولادى، سونىمەن قاتار اشىق اسپان استىندا ءتۇرلى سپورت، كوركەم، مۋزىكا الاڭدارى جۇمىس ىستەيدى، بۇلاردا شەبەرلىك سىنىپتارى، بالالار جانە وتباسىلىق ويىندار ۇيىمداستىرىلادى. كورمە اۋماعىندا قولونەرشىلەر كەلۋشىلەرگە وزدەرى جاساعان زەرگەرلىك بۇيىمدارىن ۇسىنادى، سونىمەن قاتار وسى جەردەن قولونەر شەبەرلەرىنىڭ اكسەسسۋارلارىن، فۋرنيتۋرالارىن الۋعا بولادى.

ءدال وسى كۇنى «الماتى ارەنادا» ساعات 17:00-دە وتاندىق جانە شەتەلدىك ەسترادا جۇلدىزدارىنىڭ قاتىسۋىمەن «ەما-2017» ەۆرازيالىق مۋزىكالىق سىيلىعى وتەدى.

قالا كۇنىنە وراي الماتىنىڭ تاريحي ورتالىعىنىڭ ۇشتەن ءبىرىن جاڭارتۋ جۇمىستارىن اياقتاۋ جوسپارلانعان. قايتا جاسالعان پانفيلوۆ، كابانباي باتىر مەن گوگول كوشەلەرىندە ارىق پەن جاۋىن جۇيەلەرى جاڭعىرتىلدى، نىسانداردىڭ سىرتقى كەلبەتى ءبىرىڭعاي اەسم كەلبەتكە ەندى جانە كىشى ءپىشىندى ارحيتەكتۋرلىق فورمالار، قۇرعاق فونتاندار ورناتىلىپ، بالالار جانە سپورت الاڭدارى جاسالدى.

جاقىندا عانا قالا كۇنىنە وراي قايتا جاسالعان «استانا» الاڭى، ناۋرىزباي اۋدانىنىڭ اكىمشىلىك- ىسكەرلىك ورتالىعى، «Open Almaty» قوعامدىق قابىلداۋ نىسانى اشىلعان ەدى.

ايتا كەتەرلىگى، بيىلعى جىلى ءار اۋداندا 472 جاڭا اۋلالار جانە ەكىدەن جۇرگىنشى ايماقتارى پايدا بولادى. جىل اياعىنا دەيىن 102 وتپەلى جول رەتكە كەلتىرىلىپ، ءتۇن مەزگىلىندە ولارعا جارىق بەرىلەدى. قالادا 317كم سۋ قۇبىرلارى مەن 265 كم كارىز جەلىلەرىن جۇرگىزۋ جانە قايتا جاساۋ ءۇشىن قارجى بولىنگەن.