ۇلتتىق ۇلاننىڭ 20 جاۋىنگەرى «كۇرەڭ بەرەت» يەگەرى اتاندى، - دەپ حابارلايدى Qamshy.kz اقپارات اگەنتتىگى ق ر ۇلتتىق ۇلان باسپا ءسوز قىزمەتىنە سىلتەمە جاساي وتىرىپ.

 بۇگىن قازاقستان رەسپۋبليكاسى ۇلتتىق ۇلانى «قاپتاعاي» وقۋ ورتالىعىندا ەكى كۇندىك  سىناقتان وتكەن جاۋىنگەرلەرگە قازاقستان رەسپۋبليكاسى ۇلتتىق ۇلانىنىڭ ارنايى ماقساتتاعى «بۇركىت» ءبولىنىسى اسكەري قىزمەتشىلەرىنىڭ كۇرەڭ بەرەت كيۋ مارتەبەسى جانە «بۇركىت» كەۋدە بەلگىسىن تاعۋعا قول جەتكىزۋ ءۇشىن قورىتىندى كۆاليفيكاسيالىق سىناق تاپسىرۋ شاراسى ءوتتى. شاراعا ق ر قاۋىپسىزدىك كەڭەسىنىڭ اسكەري قاۋىپسىزدىك جانە قورعانىس ءبولىمىنىڭ جەتەكشىسى گەنەرال-مايور مۋسليم التىنبايەۆ، ۇلتتىق ۇلان باس قولباسشىسى گەنەرال-لەيتەنانت رۋسلان جاقسىلىقوۆ، ەلىمىزدىڭ كۇش قۇرىلىمى ارنايى بولىمشەلەرىنىڭ، مەملەكەتتىك ورگانداردىڭ، بۇقارالىق اقپارات قۇرالدارى وكىلدەرى قاتىستى.

«بۇركىت» ءبولىنىسى اسكەري قىزمەتشىلەرىنىڭ كۇرەڭ بەرەت كيۋ كۆاليفيكاسيالىق سىناقتارى جىل سايىن ەلىمىزدىڭ ءار ءتۇرلى كليماتتىق بەلدەۋىندە وتەدى جانە ەكى كەزەننەن تۇرادى.  وسى جولى استانادا وتكەن سىناقتا كۇرەڭ بەرەتكە ۇمىتكەرلەر باس-اياعى  19 ءنورماتيۆتى ورىندادى.  ونىڭ ىشىندە قارۋ-جاراعىمەن 75 شاقىرىمدىق قاشىقتىقتى  جۇگىرىپ شىعۋ، سۋلى وتكەلدى مالتىپ ءوتۋ، تاجىريبەلىك اتىس جانە بەلگىلەنگەن ۋاقىت ىشىندە ءۇش قارسىلاسپەن ۇرىسقا ءتۇسۋ نورماتيۆتەرى بار.

بيىل ەلىمىزدىڭ بارلىق وڭىرىنەن كەلگەن كۇرەڭ بەرەت كيۋگە  ۇمىتكەر ەكى جۇزگە جۋىق اسكەري قىزمەتشى كۆاليفيكاسيالىق سىناق تاپسىرۋعا ىنتا تانىتتى.  ونىڭ تەك 91ء-ى عانا جارىس جولىنا جىبەرىلدى. ەكى كۇندىك سىناقتان سوڭ 18 جاۋىنگەر اقتىق سىنعا دەيىن جەتكەن بولاتىن.

سونداي-اق، بيىل اتالمىش  سىناقتى ساپالى وتكىزۋ ماقساتىندا جانە كۇرەڭ بەرەتكە ۇمىتكەرلەردىڭ نورماتيۆتەردى ورىنداۋىن باقىلاۋ ءۇشىن    ونىڭ بارلىق كەزەڭىندە  «كۇرەڭ بەرەت» ورتالىق كەڭەسىنىڭ مۇشەلىگىندە تۇرعان 37 نۇسقاۋشى جانە اعا نۇسقاۋشىلار تارتىلدى.

ولارعا سالتاناتتى جاعدايدا كۇرەڭ بەرەت پەن «بۇركىت» كەۋدە بەلگىسى تابىس ەتىلدى. وسى جولى سىناقتان سۇرىنبەي وتكەن 18 جاۋىنگەردەن بولەك، ارنايى ماقساتتىڭ ەكى جاۋىنگەرى كۇرەڭ بەرەت كيۋ مارتەبەسىنە يە بولدى. ولار الماتى جانە اقتوبە قالاسىندا وتكەن  ارنايى وپەراسيالاردا ەرلىك كورسەتكەندەر. سونىمەن بيىلعى جىلى 20 جاۋىنگەر كۇرەڭ بەرەت يەسى اتاندى.

- كۇرەڭ بەرەت كيۋ مارتەبەسى يەسىنە ەشقانداي ماتەريالدىق كومەك الىپ كەلمەيدى. ولاردىڭ جالاقىسى بۇرىنعىشا قالا بەرمەك. ولار تەك وتاندى قورعاۋ كەزىندە العى شەپكە شىعىپ، العاشقىلاردىڭ ءبىرى رەتىندە اتتانۋعا قۇقىعى بار. بۇل تەك وتانعا رياسىز بەرىلگەن ازاماتتار رەتىندە بولىپ قالا بەرەدى. ءبىزدىڭ ماقساتىمىز وسىنداي ازاماتتاردى ىرىكتەپ، ەلىمىزدىڭ تىنىشتىعىن قامتاماسىز ەتۋ،-دەدى گەنەرال-لەيتەنانت رۋسلان جاقسىلىقوۆ، جۋرناليستەرگە ارنالعان بريفينگتە.