تۇركيانىڭ اقساراي قالاسىنا قاراستى سۇلتانحانى اۋدانىندا قازاق تاريحى مەن مادەنيەتىن حالىققا تانىستىرۋ ءۇشىن كيىز ءۇي پىشىندەگى قازاق مۋزەيى مەن ساياباق سالىنادى دەپ حابارلايدى Qamshy.kz اقپارات اگەنتتىگى. 

3500 شارشى مەترلىك ساياباق پەن مۋزەيدىڭ ىرگە تاسى 2017 جىلى 15 قىركۇيەك كۇنى قالاندى. ىرگە تاسىن قالاۋ راسىمىنە قازاق ءبىلىم جانە زەرتتەۋ قوعامىنىڭ ءتوراعاسى سەرقان دىنىشتۇرىك، سۇلتانحانى اۋدان اكىمدەرىنىڭ ورىنباسارلارى حاسان تەمەل مەن فاتيح اعىر دا قاتىستى.  

قوعام ءتوراعاسى سەرقان دىنىشتۇرىكتىڭ ايتۋىنشا، قازاق ساياباعى مەن مۋزەيىنىڭ قۇرىلىسى ءبىر اي ىشىندە ءبىتىپ، تۇركيا رەسپۋبليكاسىنىڭ 94 جىلدىعى مەرەكەلەنەتىن 29 قازان كۇنى تۇساۋكەسەرى جاسالماق. تاريحي جىبەك جولى بويىنداعى اقساراي قالاسىندا 1299 جىلى سەلچۇق مەملەكەتى كەزىندە سالىنعان اتاقتى سۇلتان حان كەرۋەنسارايىنا 250 م. جەردەگى ساياباققا شەتەلدىك تۋريستەردىڭ كوپتەپ كەلۋى كۇتىلۋدە.

مۋزەيدە اسىرەسە تۇركيا قازاقتارىنىڭ كوش تاريحى مەن مادەنيەتىنە قاتىستى بۇيىمدارعا ورىن بەرىلمەك.1952 جىلى پاكىستاننان تۇركياعا قونىس اۋدارعان قازاقتاردان 60 وتباسى اقساراي سۇلتانحانىنا قونىستانعان. كۇن كورۋدىڭ قامىمەن قازاقتار كەيىن ىستامبۇلعا جانە فرانسيا استاناسى پاريجگە كوشىپ كەتۋگە ءماجبۇر بولعان. الايدا سۇلتانحانىندا قازاقتاردىڭ 1968 جىلى سالعان “تۇركىستاندىقتار مەشىتى” 1974 جىلى كۇردەلى جوندەۋدەن ءوتتى. 

ساياباق پەن مۋزەيدىڭ بۇكىل شىعىندارىن تۇركيا مەن فرانسياداعى قازاقتار كوتەردى. 29 قازاندا وتەتىن تۇساۋكەسەر راسىمىنە قازاقستاننىڭ تۇركياداعى ەلشىسى ابزال ساپاربەك ۇلى قاتىسادى دەپ كۇتىلۋدە. وسىندي يگى ىسكە مۇرىندىق بولعان ازاماتتارعا العىسىمدى بىلدىرەمىن.

ءابدىۋاقاپ قارا
تاريح عىلىمىنىڭ دوكتورى

ميمار سينان كوركەم ونەر ۋنيۆەرسيتەتىنىڭ پروفەسسورى