كراسنودار ايماعىنىڭ تەرگەۋ ورگاندارى كەزەكتى قاندى قىلمىسقا قاتىستى تەرگەۋ جۇمىستارىن جۇرگىزۋدە. كۇدىكتى رەتىندە دميتريي جانە ناتاليا باكشەيەۆا ەسىمدى وتباسىلىق جۇپ قولعا تۇسكەن. 11 قىركۇيەكتە جوندەۋ جۇمىستارى ءجۇرىپ جاتقان رەپينا كوشەسىنەن جۇمىسكەرلەر ۇيالى تەلەفون تاۋىپ العان. ول تەلەفوننىڭ ىشىندە ادامنىڭ دەنە مۇشەلەرىمەن – باسى، قولدارى – تۇسىرىلگەن سۋرەتتەردى كورگەن. ادام شوشىرلىق ىس-ارەكەتتى كورگەن جۇمىسكەرلەر بۇل مالىمەتتى دەرەۋ قۇزىرلى ورگاندارعا حابارلاعان، دەپ جازادى Qamshy.kz اقپارات اگەنتتىگى جەرگىلىكتى باق-قا سىلتەمە جاساپ.

پوليسيا قىزمەتكەرلەرى ۇيالى تەلەفوننىڭ  35 جاستاعى دميتريي باكشەيەۆكە تيەسىلى ەكەندىگىن انىقتادى. قاماۋعا الىنعاننان كەيىن كۇدىكتى كىناسىن مويىنداماي، ادامنىڭ دەنەلەرىن اۆياگورود اۋدانىنا تاۋىپ الىپ، ءجاي عانا سۋرەتكە تۇسكەندىگىن ايتىپ، سەندىرمەك بولعان.

12 قىركۇيەكتە ۇيالى تەلەفون تابىلعان جەردەن دەنە مۇشەلەرى بولشەكتەلىپ تاستالعان ايەلدىڭ ءمايىتىن تاۋىپ العان. ونىڭ ءمايىتىن بولشەكتەپ، شەلەك پەن پاليەتەن پاكەتتەرىنە سالىپ قويىپتى. سونىمەن قاتار، وقيعا ورنىنا جاقىن ماڭنان ءمايىتتىڭ سومكەسى مەن جەكە زاتتارى تابىلدى.

تەرگەۋ ورگاندارى كۇدىكتىلەردىڭ ءۇيىن ءتىنتىپ، كوپتەگەن ۇيالى تەلەفونداردى قۇرىقتاعان. بەلگىلى بولعانداي، ادام ەتىن جەيتىن جۇپتىڭ قۇرباندارىنا تيەسىلى ەكەن. ال توڭازىتقىشتا ادام ەتىن جەيتىن وتباسىلىق جۇپ ادامنىڭ دەنەلەرىن بولشەكتەپ، پاكەتكە سالىپ، ساقتاپ قويىپتى. سونىمەن قاتار، ولار ادام ەتىنەن تاماقتى قالاي دايىنداۋ كەرەكتىگىن كورسەتەتىن ۆيدەولار تابىلعان.

تەرگەۋ بارىسىندا تابىلعان سۋرەتتەردىڭ ءبىرى – 1999 جىل 28 جەلتوقساندا جازىلعان قىلمىسكەرلەرگە قاتىستى قۇجات ولاردىڭ قىلمىستارىنىڭ ايقىن دالەلىن كورسەتتى. بەرىلگەن فاكتىگە سايكەس، بۇل وتباسىلىق جۇپ 20 جىلدان بەرى ادامداردى ءولتىرىپ، ولاردىڭ ەتىنجەپ كەلگەن.

تەرگەۋ كەزىندە ناتاليا باكشەيەۆا ءوز كىناسىن مويىنداپ، فوتوسۋرەتتەن 30-دان استام قۇرباندارىن تانىپ، ايتىپ بەردى. ونىڭ ايتۋىنشا، كۇيەۋى ەكەۋى ادامداردى ءولتىرىپ، كەيىن ولاردىڭ ەتىمەن قورەكتەنگەن ەكەن. ال ولاردىڭ قۇرباندارىنا اينالعان ادامداردىڭ بارلىعى – ىزدەۋ سالىنىپ، ءىز-تۇزسىز جوعالىپ كەتكەندەر.

بەلگىلى بولعانداي، ناتاليا باكشەيەۆا وسى ۋاقىتقا دەيىن ۇشقىشتارعا ارنالعان ۋچيليششەدە مەدبيكە بولىپ قىزمەت اتقارعان. تەرگەۋشىلەر كۋرسانتتارعا ادامنىڭ ەتىن قوسىپ تاماق بەرگەن دەپ بولجاۋ جاسادى.

كراسنودار ايماعىنىڭ تۇرعىندارى بۇل اقپاراتتى دەرەۋ جان-جاقتى تاراتىپ، ساق بولۋعا شاقىردى. باق-تا كورسەتىلگەن مالىمەتتەرگە سايكەس، ادام ەتىن جەگىش وتباسىلىق جۇپ ۋچيليششەگە تيەسىلى جاتاقحانادا تۇرعان.

قازىرگى ۋاقىتتا قىلمىستىق ىسكە قاتىستى تەرگەۋ جۇمىستارى جالعاسۋدا.