الماتى قالاسىندا «Almaty Invest 2017» حالىقارالىق بەسىنشى ينۆەستيسيالىق فورۋمى ءوتتى، دەپ جازادى Qamshy.kz اقپارات اگەنتتىگى.

الماتى اكىمى باۋىرجان بايبەك الماتى قالاسىن تۋريستەر ءۇشىن ەڭ جايلى قالا دەپ اتادى. بۇل تۋرالى باۋىرجان بايبەك الماتى قالاسىنىڭ بەسىنشى ينۆەستيسيالىق فورۋمىندا ءمالىم ەتتى.

اكىمنىڭ ايتۋىنشا، وسى جىلى قالاعا تۋريستەردىڭ كەلۋى 2 ەسەگە ۇلعايعان، ال قازاقستاندىقتار اراسىندا الماتى قالاسىنا كەلۋشىلەردىڭ سانى 37%-عا ارتقان. جالپى تۋريستەر قالاعا قىزىعۋشىلىق تانىتا باستادى.

«الماتىنىڭ تۇرعىندارى وتە بەلسەندى. ءتىپتى كەيبىر زەرتتەۋلەردىڭ ناتيجەسىنە سۇيەنسەك، الماتىدا ەڭ كوڭىلدى، اقجارقىن ادامدار تۇرادى. تۇرعىنداردىڭ مەيىرباندىعىنىڭ ارقاسىندا قالاعا ءار جىل سايىن تۋريستەر اعىلىپ كەلىپ جاتادى. الماتى – قازاقستانداعى تابيعاتى جاعىنان دا ەرەكشە قالالاردىڭ ءبىرى. تۋريستەردىڭ كوپتەپ كەلۋىنە قالا تابيعاتىنىڭ دا اسەرى مول. كوكتەمنىڭ العاشقى كۇندەرى تاڭعا جۋىق شاڭعى تەۋىپ، كۇندىز گولف ويناپ، كەشكە زاماناۋي بالەتكە بارۋعا بولادى. الماتى – مۇمكىندىكتەر قالاسى. الماتىلىقتار اقشا تابۋدى دا، دەمالۋدى دا، جايلى ءومىر ءسۇرۋدى دە جاقسى بىلەدى»، - دەدى بايىرجان بايبەك.

ايتا كەتەر بولساق، فورۋم باعدارلاماسىندا لوگيستيكاعا، بىلىمگە، تاماق ونەركاسىبىنە جانە كينويندۋسترياعا ارنالعان 4 سەكسيانىڭ كوزدەلگەن. بۇل سالالار قارقىندى تۇردە دامۋدا جانە ينۆەستيسيالار سالۋدىڭ كەلەشەگى زور سالالارى بولىپ ەسەپتەلەدى.

سونىمەن قاتار، بۇرىن وتكەن فورۋمداردا 7،7 ملرد. تەڭگەنىڭ 5 جوباسى قازىرگى كەزدە ىسكە اسىرىلىپ، 1230 جۇمىس ورنى قۇرىلعاندىعى بەلگىلى بولدى.

الماتى قالاسى كاسىپكەرلىك جانە يندۋستريالدى-يننوۆاسيالىق دامۋ باسقارماسىنىڭ باسشىسى ماقسات قيقىموۆ «Almaty Invest» جىل سايىن ءوزىنىڭ الاڭىندا بەدەلدى ساياساتكەرلەردى، الەمدىك جانە وتاندىق بيزنەس كوشباسشىلارىن، ينۆەستيسيالىق كورپوراسيالار، قارجى ينستيتۋتتارى جانە حالىقارالىق ۇيىمدار باسشىلارىن جينايتىنىن جەتكىزدى.

وسى جىلعى فورۋم جۇمىسىنا الەمنىڭ 28 ەلىنەن كەلەتىن 500-دەن استام دەلەگات قاتىسىپ، ءىس-شارانى قازاقستاندىق تاۋەلسىز بۇقارالىق اقپارات قۇرالدارىنىڭ نەگىزىن قالاۋشىلاردىڭ ءبىرى بيزنەسمەن ارمانجان بايتاسوۆ جۇرگىزگەن بولاتىن. فورۋمنىڭ باسىم مىندەتى شەتەلدىك ينۆەستورلاردى تارتۋ، سونداي-اق ىسكە اسىرىلعان جوبالارمەن قاتار، ينۆەستيسيالار سالۋدى قاجەت ەتەتىن كەلەشەك جوبالاردىڭ تۇساۋ كەسەرىن كورسەتۋ بولىپ ەسەپتەلەدى.

سونىمەن قاتار، «Land Master Co.، Ltd» وڭتۇستىك كورەيا كومپانياسىمەن 10 مىڭ ءتۇپ كوشەت وتىرعىزىلدى، كوشەتتىك اشىلدى، Moskva Metropolitan ساۋدا ورتالىعىنىڭ 2ء-شى كەزەگى ىسكە قوسىلدى.

فورۋم شەڭبەرىندە الماتى قالاسىنىڭ ينۆەستيسيالىق مۇمكىندىكتەر، جوبالاردى قارجىلاندىرۋدىڭ جانا تەتىكتەرى ۇسىنىلدى. سونداي-اق، كولىكتىك-لوگيستيكالىق ينفراقۇرىلىمدى، ۇلتتىق يننوۆاسيالىق جۇيەنى، ءتۋريزمدى جانە جاسىل ەكونوميكاعا كوشۋدىڭ نەگىزدەرىن دامىتۋ ماسەلەلەرى تالقىعا سالىندى.

فورۋم بارىسىندا بىرلەسكەن جوبالاردى ىسكە اسىرۋ جانە ءتيىستى كەلىسىمدەر جاساۋدا بيزنەس وكىلدەرى مەن ينۆەستورلاردىڭ ءوزارا ىس-ارەكەت جاساۋى ءۇشىن الاڭ قۇرىلاتىندىعى جايىندا ايتىلدى.