بەلارۋس ەلىنىڭ باس قالاسى مينسكىدە قازاق كۇرەسىنەن  VII الەم چەمپيوناتى تۇڭلىگىن ءتۇردى. الەمنىڭ 45-كە جۋىق  ەلىنەن بالۋاندار جينالعان دودا بەس سالماق دارەجەسىندە وتەدى.  دۇنيەجۇزىلىك قازاق كۇرەسى فەدەراسياسىنىڭ  ۇيىتقى بولۋىمەن ءوتىپ جاتقان الەم چەمپيوناتى بارىسىندا تورەشىلەرگە ارنالعان سەمينار ۇيىمداستىرىلدى.

دۇنيەجۇزىلىك قازاق كۇرەسى فەدەراسياسىنىڭ باس حاتشىسى نۇرلىبەك ەرماعانبەتوۆ شەتەلدەن كەلگەن كوماندالارداعى تورەشىلەرگە الەم چەمپيوناتى كەزىندە قالاي تورەلىك جاساۋ كەرەكتىگىن ءتۇسىندىردى. ەكراننان ارنايى دايىندالعان بەينەجازبا ارقىلى بەلدەسۋ بارىسىندا تورەشىلەردىڭ قازىلىق ەتۋدە قانداي ءىس-قيمىل جاساۋ كەرەكتىگىن ايتتى.

شەتەلدىك تورەشىلەر دە وزدەرىنىڭ كوكەيىندە جۇرگەن ساۋالدارىن جولداپ تۇشىمدى جاۋاپ الدى.

دۇنيەجۇزىلىك قازاق كۇرەسى فەدەراسياسى تورەشىلەر القاسىنىڭ ءتوراعاسى ماحمۇت-باقىت جاڭبىربايەۆ سەمينار بارىسىندا ءسوز الىپ، شەتەلدىك تورەشىلەردىڭ قازاق كۇرەسىنەن قازىلىق ەتۋگە كادىمگىدەي توسەلىپ قالعانىن جەتكىزدى. "بىرىككەن كۇرەس الەمىنىڭ" (UUW ) باعدارلاماسىنا ەنگىزىلگەن بۇل الەم چەمپيوناتى بارىسىندا قازىلىق ەتەتىن تورەشىلەر اقيقاتتان اتتامايدى دەپ سانايمىن. قازاق كۇرەسىنەن  الەم چەمپيوناتتارى بۇعان دەيىن التى رەت وتكىزىلدى. تورەشىلەرگە ەشقاشان وكپە-رەنىش ايتىلعان ەمەس. بۇل جولى دا قازىلار ءادىل تورەلىك ەتەدى دەپ سانايمىن. وتكەن ايدا عانا تۇركىمەنستاندا جابىق كەشەندەگى ازيا ويىندارى بولدى. قازاق كۇرەسى تۇڭعىش رەت جابىق كەشەندەگى ازيا ويىندارىنىڭ باعدارلاماسىنا قوسىلدى. مىنە وسى دودا كەزىندە شەتەلدىك تورەشىلەر قازاق كۇرەسى سايىسىندا وتە جاقسى قازىلىق ەتتى. ەشقانداي دا جاڭىلىسۋ، ۇپاي بەرۋدە قاتەلەسۋ بولعان جوق. دۇنيەجۇزىلىك قازاق كۇرەسى فەدەراسياسى ءتول كۇرەسىمىزدى الەم ەلدەرىنە ناسيحاتتاپ فەدەراسيالار اشىپ، سول ەلدەردە كۇرەستى  دامىتۋ ءۇشىن تورەشىلەردى دە دايارلاۋدى مىقتاپ قولعا الدى. ەلىمىزدىڭ تاجىريبەسى تولىسقان تورەشىلەرى شەتەلدەرگە بارىپ ارنايى سەمينار وتكىزىپ، تاجىريبەلەرىمەن ءبولىسىپ ءجۇر.  سونىڭ ناتيجەسىن كۇنى كەشە اشحاباد كىلەمىندە كوردىك. مينسكىدەگى الەم چەمپيوناتىندا دا تورەشىلەر بىلىكتىلىگىن پاش ەتەدى" دەدى ماحمۇت-باقىت جاڭبىربايەۆ.

قۋانىش باجاق،

بەلارۋس، مينسك قالاسى