الماتىدا «الاش» پارتياسىنىڭ قۇرىلعانىنا 100 جىل تولۋىنا وراي «ايبىنىم الاش» اتتى شىعارماشىلىق كەش ۇيىمداستىرىلىپ، وندا الاش قايراتكەرلەرىنىڭ ولەڭدەرى وقىلدى،- دەپ جازادى Qamshy.kz اقپارات اگەنتتىگى.

كەشتى قازاقستان جازۋشىلار وداعى ءتوراعاسىنىڭ ورىنباسارى عالىم جايلىباي اشتى. «الاش ارىستارىنىڭ كەيىنگى ۇرپاققا قالدىرعان مۇراسى ۇشان-تەڭىز. بۇگىنگى ءىس-شارا سول مۇرانى الماتى قالاسىنىڭ تۇرعىندارىنا ناسيحاتتاۋ ءۇشىن وتكىزىلىپ وتىر» دەدى ول.

اتالعان ءىس-شارادا تەمىربەك جۇرگەنوۆ اتىنداعى ونەر اكادەمياسىنىڭ، جۇسىپبەك ەلەبەكوۆ اتىنداعى رەسپۋبليكالىق ەسترادا-سيرك كوللەدجىنىڭ ستۋدەنتتەرى، ساتبايەۆ ۋنيۆەرسيتەتىنىڭ «بايشەشەك» ادەبي بىرلەستىگىنىڭ ونەرپازدارى، اباي اتىنداعى رەسپۋبليكالىق مامانداندىرىلعان دارىندى بالالارعا ارنالعان قازاق ءتىلى مەن ادەبيەتىن تەرەڭدەتە وقىتاتىن ورتا مەكتەپ-ينتەرناتتىڭ وقۋشىلارى، جاس اقىندار ونەر كورسەتتى. ولار احمەت بايتۇرسىنوۆ، ءمىرجاقىپ دۋلاتوۆ، ماعجان جۇمابايەۆ، بەيىمبەت مايلين، سۇلتانماحمۇت تورايعىروۆ سىندى الاش قايراتكەرلەرىنىڭ ولەڭدەرىن كومپوزيسيالىق قويىلىم تۇرىندە وبرازبەن ورىندادى. جاس اقىندار توبى الاشتىقتارعا، ونىڭ ىشىندە ءاليحان بوكەيحانوۆ، ءمىرجاقىپ دۋلاتوۆتارعا ارناپ ولەڭدەر وقىدى. شىعارماشىلىق كەش بارىسىندا قوناقتارعا الاشتانۋشى-عالىم بولات ءمۇرسالىم تۇسىرگەن «الاشتىڭ ون ەكىنشى جەلتوقسانى» دەرەكتى ءفيلمى كورسەتىلدى. كورەرمەندەر فيلمنەن مۇستافا شوقاي مەن ءالىمحان ەرمەكوۆتىڭ جاندى داۋسىن ەستىپ، ءبىر تەبىرەنىپ قالدى.

الاشوردانىڭ ءبىر عاسىرلىق مەرەيتويىنا ارنالعان كەشتى ت.جۇرگەنوۆ اتىنداعى ونەر اكادەمياسىنىڭ «ساحنا ءتىلى» كافەدراسىنىڭ مەڭگەرۋشىسى، پروفەسسور، قازاقستاننىڭ ەڭبەك سىڭىرگەن قايراتكەرى داريعا تۇرانقۇلوۆا قورىتىندى سوزبەن اياقتادى. «مەن ساحنا ونەرىنىڭ مامانى رەتىندە، بۇگىنگى كەشكە وتە جوعارى باعا بەرەمىن. كوپ جۇرت تەك جەڭىل مۋزىكاعا اۋەستەنىپ جاتقاندا، سىزدەردىڭ وسىنداي ساليقالى ءىس-شارا وتكىزىپ جاتقاندارىڭىز ۇلكەن ەڭبەك. سىزدەرگە بارلىق كەزدە شىعارماشىلىق تابىس تىلەيمىن» دەپ ول جۇرەكجاردى لەبىزىن ءبىلدىردى.

قاتىسۋشىلاردىڭ بارلىعى كەشتەن ولجالى قايتتى. ولاردىڭ ءارقايسىسىنا ىشىندە 400-دەن استام تاريحي فوتولار جيناقتالعان «الاشوردا» فوتوالبومى مەن العىس حاتتار تابىس ەتىلدى. «الاشوردا» فوتوالبومىنىڭ جارىققا شىعۋىنا «سامۇرىق-قازىنا» ءال-اۋقات قورى دەمەۋشىلىك جاسادى.

سونىمەن قاتار شىعارماشىلىق كەش اياسىندا قازاقستان رەسپۋبليكاسى ۇلتتىق كىتاپحاناسىنىڭ قولداۋىمەن «الاش» پارتياسىنىڭ ءجۇز جىلدىق مەرەيتويىنا وراي كىتاپ كورمەسى وتكىزىلدى. كورمەگە الاش ارىستارىنىڭ وزدەرى جازعان ەڭبەكتەر مەن بۇگىنگى عالىمداردىڭ الاشتانۋ تاقىرىبىندا قۇراستىرعان جۇزدەگەن كىتاپتارى قويىلدى.

ايتا كەتەيىك، «ايبىنىم الاش» اتتى شىعارماشىلىق كەشتى الماتى قالاسى ىشكى ساياسات باسقارماسىنىڭ تاپسىرىسى بويىنشا «ەل-شەجىرە» قوعامدىق قورى ۇيىمداستىردى.