فۋتبولدان قازاقستان ۇلتتىق قۇراماسى 2018 جىلى رەسەيدە وتەتىن الەم چەمپيوناتىنا ىرىكتەۋ كەزەڭىن اياقتادى، دەپ حابارلايدى Qamshy.kz اقپارات اگەنتتىگى Vesti.kz سايتىنا سىلتەمە جاساپ.

فۋتبولدان قازاقستان ۇلتتىق قۇراماسى 2018 جىلى رەسەيدە وتەتىن الەم چەمپيوناتىنا ىرىكتەۋ كەزەڭىن اياقتادى. توپتاعى سوڭعى ويىندا قازاقستاندىق فۋتبولشىلار ارمەنيا قۇراماسىمەن تەڭ وينادى.

استانادا وتكەن ويىندا قوس قۇراما 1:1 ەسەبىمەن تەڭ تارقاستى. ءبىرىنشى تايمدا قوناقتار ساپىنان كوماندا كاپيتانى گەنريح محيتاريان گول سوقتى. ال وعان وسىعان دەيىن "اقتوبە" ساپىندا ويناپ كەتكەن ماركوس پيزەللي ناتيجەلى پاس بەردى. ال وعان دەيىن قازاقستان قۇراماسى ساپىنان ازات نۇرعالييەۆ پەن رومان مۇرتازايەۆ ءوز مۇمكىندىكتەرىن پايدالانا الماعان ەدى.

ەكىنشى تايمدى شيراق باستاعان قازاقستان قۇراماسى تارازى باسىن تەڭەستىرۋگە ۇمتىلدى. 62 مينۋتتا قاپتالدان رومان مۇرتازايەۆتىڭ اۋەلەتە اسىرعان دوبىنا باۋىرجان تۇرىسبەك ءبىرىنشى جەتىپ، ەسەپتى تەڭەستىردى. ونىڭ باسپەن باعىتتاعان دوبىن ارمەنيا قۇراماسىنىڭ قاقپاشىسى ارسەن بەگلاريان قايتارا المادى. ال سوڭعى ساتتە قوناقتار گول سوعۋعا زور مۇمكىندىك العانمەن، قورعاۋشى يۋريي لوگۆينەنكو قازاقستان قۇراماسىن جەڭىلىستەن قۇتقارىپ قالدى.

توپتاعى 10 ويىننان كەيىن 3 ۇپاي جيناعان قازاقستان قۇراماسى سوڭعى ورىندا (6-ورىن) قالدى. پولشا قۇراماسى توپتاعى ايقىن كوشباسشى رەتىندە الەم چەمپيوناتىنا جولداما الدى.