قازاقستان رەسپۋبليكاسى اقپارات جانە كوممۋنيكاسيالار مينيسترلىگىنىڭ تاپسىرىسىمەن «قازمەديا ورتالىعى» ۇيىمداستىرعان «Astana Media Week» قازاقستاندىق مەديا-اپتاسى 2017 جىلعى 4-6 قازان ارالىعىندا «قازمەديا ورتالىعى» حالىقارالىق مەديا-حابىنىڭ اۋماعىندا وتكىزىلدى دەپ حابارلايدى Qamshy.kz اقپارات اگەنتتىگى.

مەديا-اپتانى اشا وتىرىپ، قازاقستان رەسپۋبليكاسى اقپارات جانە كوممۋنيكاسيالار ءمينيسترى داۋرەن ابايەۆ بىلاي دەدى: «ءبىزدىڭ اپتا ءداستۇرلى وقيعاعا اينالاتىنىنا، جىل سايىن تەك قانا قازاقستاننىڭ عانا ەمەس، سونىمەن قاتار بارلىق ءوڭىرىمىزدىڭ جۋرناليستەرى، مەديا حولدينگتەرى، ب ا ق جانە سالالىق مينيسترلىكتەرى اراسىندا تىعىز سەرىكتەستىك بايلانىستار قۇرۋدا ماڭىزدى ءرول وينايتىنىنا سەنەمىز. ستراتەگيالىق تۇرعىدان ءبىز وسى كەرەمەت «قازمەديا ورتالىعى» عيماراتىنىڭ نەگىزىندە ورتاشا مەرزىمدى پەرسپەكتيۆادا وڭىرلىك مەديا-حاب قۇرۋدى ماقسات تۇتامىز».

مەديا-اپتاعا ۇيىمداستىرىلعان 10 ءىس-شارانىڭ شەڭبەرىندە 2000-نان استام قاتىسۋشىلار مەن 103 سپيكەر جينالدى.

 مەديا-اپتا اياسىندا 2017 جىلعى 4 قازاندا مەديا سالاسىنىڭ قاتىسۋشىلارى ءۇشىن «كونتەنت-ماركەت» كورمەسى ءوتتى. ءىس-شاراعا 25 رەسپۋبليكالىق جانە ايماقتىق تەلەارنا، سونداي-اق ەلىمىزدىڭ بارلىق وڭىرىنەن 100-دەن اسا پروداكشن-كومپانيالار قاتىستى. جاڭا تەلەباعدارلامالاردى، رەاليتي-شوۋلاردى، مۋلتفيلمدەردى، كوركەم جانە دەرەكتى فيلمدەردى ۇسىنۋ ءۇشىن پيچينگ ۇيىمداستىرىلدى. وندا پروداكشن-ستۋديالار ينۆەستورلار مەن ساتىپ الۋشىلاردى تابۋ ماقساتىندا وزدەرىنىڭ ەكسكليۋزيۆتى بەينە كونتەنتتەرىن ۇسىندى.

قازاقستاندىق ب ا ق، كينو- جانە پروداكشن-ستۋديالاردان باسقا «كونتەنت-ماركەتكە» قۇرمەتتى قوناقتار رەتىندە 7 شەتەلدىك دەلەگاسيا كەلدى.

سونىمەن بىرگە مەديا-اپتانىڭ ءبىرىنشى كۇنىندە Media Talks تالقىلاۋ الاڭىنىڭ جۇمىسى ءوتتى. وندا 7 سپيكەر بەيرەسمي قالىپتا وزدەرىنىڭ جەتىستىكتەرىنىڭ حيقاياسى تۋرالى ايتىپ، كاسىبي قۇپيالارىمەن سالانىڭ قالىپتاسقان جانە جاڭا باستاپ جۇرگەن جۇمىسكەرلەرىمەن ءبولىستى.

2017 جىلعى 5 قازاندا ASTANA DIGITAL FORUM ءوتتى. حالىقارالىق كونفەرەنسياعا 23 سپيكەر ءارى سالانىڭ 300-دەي وكىلى جينالدى.

2017 جىلعى 5 جانە 6 قازاندا اقپارات جانە كوممۋنيكاسيالار مينيسترلىگىنىڭ تاپسىرىسىمەن «باس رەداكتورلار كلۋبى» قق، «ەل-شەجىرە» قق ايماقتىق ب ا ق وكىلدەرى ءۇشىن 8 سەمينار جانە ترەنينگ ۇيىمداستىردى.        

2017 جىلعى 6 قازاندا «ايماقتىق ب ا ق فورۋمى» ءوتتى. وندا مەديا سالاسىنىڭ بەدەلدى ساراپشىلارى مەديا-كونتەنت ساپاسىن كوتەرۋ ماسەلەلەرىن، سونىمەن قاتار ب ا ق سالاسىنداعى زاڭنامانى تالقىلادى. «ايماقتىق ب ا ق فورۋمىنىڭ» جۇمىسىنا بارلىعى 20-دان استام بەلگىلى سپيكەر مەن ەلىمىزدىڭ تۇكپىر-تۇكپىرىنەن 400 جۋرناليست قاتىستى.

 سونىمەن بىرگە 6 قازاندا ەڭ ۇزدىك باسپا ءسوز قىزمەتىن ماراپاتتاۋ ءراسىمى ءوتتى.