الماتىدا جانارماي باعاسىنىڭ كۇننەن كۇنگە شارىقتاۋى باستى ماسەلە بولىپ وتىر. ءتىپتى، قازاق جاستارى اششى مىسقىل ارالاس بەينەكليپتەر تە ءتۇسىرىپ، جەلىنى اشۋعا بۋلىقتىرۋدا.
ماسەلەن، اي-92 جانارماي باعاسى 162 تەڭگەگە كوتەرىلىپ كەتكەن. اۆتوكولىك جۇرگىزۋشىلەرى بۇرىنعىشا قولما-قول سوماعا بەنزين ساتىپ الا الماي، تاللونمەن عانا الاتىن جانارمايدىڭ قورى ءتىپتى كەيبىر بەكەتتەردە تاۋسىلىپ تا قالعان. وسىدان ءتورت كۇن بۇرىن الماتى اكىمشىلىگى جاساعان مالىمدەمەدە: «Helios، Sinooil، «قازمۋنايگاز» سىندى ءىرى جانارماي بەكەتتەرىندە 8-10 كۇنگە دەيىن جەتەرلىك جانارماي قورى بار» دەلىنگەن ەدى. الايدا، بۇگىنگى كۇنى ءتىپتى جوعارىدا اتالعان بەكەتتەردىڭ وزدەرى جانارماي جوقتىعىن العا تارتۋدا.
بۇگىندە جانارماي بەكەتتەرىنىڭ الدىندا ۇزىن سونار كولىك كەزەگىن كورۋگە بولادى. ارينە، قانداي جاعداي بولماسىن، وڭاي جەردەن ارتىق پايدا كورىپ قالۋعا تىرىسقاندار، بوس ىدىستارىن جانارمايمەن تولتىرىپ، بەكەتتەردىڭ الدىن قىزۋ ساۋداعا اينالدىرعان.
وسى جاعدايعا كىمدەردى كىنالاۋعا بولادى؟
ق ر ءماجىلىس دەپۋتاتى ماۋلەن اشىمبايەۆ بۇل جاعدايعا كىنالى «كەيبىر توپتاردىڭ تابىسىن كوبەيتۋگە تالپىنۋىنان» دەپ وتىر.
«بۇل ماسەلەنىڭ انىق-قانىعىن ءبىلىپ الۋ كەرەك، نەلىكتەن الماتى مەن استانادا جانارماي جوق؟ مۇمكىن بۇل جاعداي ەلىمىزدىڭ باسقا دا وبلىستارىندا ورىن الىپ وتىرعان شىعار. مەنىڭ ويىمشا، مەملەكەت حالىققا بۇل ماسەلەگە نە سەبەپ بولعانىن جاسىرماي ايتۋى كەرەك»،- دەدى ول تىلشىلەرگە بەرگەن مالىمدەمەسىندە.
ءماجىلىس دەپۋتاتىنىڭ ايتۋىنشا، الەمدىك نارىقتا مۇناي باعاسى ءبىر قالىپتا.
«جالپى العاندا، جانارمايدىڭ باعاسى ءبىزدىڭ كاسىپكەرلەرگە پايدا اكەلۋگە جەتكىلىكتى ەدى. سوندىقتان ءوزىمىزدىڭ مۇناي، گاز جانە قارجى نارىعى جۇمىسىن ىستەپ تۇرعاندا جانارماي تاپشىلىعى مەن قىمباتتاۋىنىڭ سەبەبىن ءتۇسىندىرۋ وتە قيىن. سول سەبەپتى ۇكىمەت بۇل جونىندە ءوزىنىڭ بۇلتارتپاس دالەلىن كەلتىرۋى ءتيىس حالىققا»،- دەپ ويىن ناقتىلادى ول.
«مۇمكىن مەنىڭ ايتقاندارىم ناقتى سەبەپتى كورسەتىپ تۇرماعان شىعار، ءبىراق مەن ودان باسقا سەبەپتى تاپپاي تۇرمىن. سول بەلگىلى ءبىر توپتاردىڭ قالتالارىن قالىڭداتپاق ويىنىڭ ناتيجەسى دەپ قانا بىلەمىن. تاعى دا قايتالاپ ايتامىن، مەملەكەت بۇل ماسەلەگە نازار اۋدارۋى ءتيىس».
ماۋلەن اشىمبايەۆتىڭ ايتۋىنشا، كەلە جاتقان سارسەنبىدە دەپۋتاتتار جانارماي ماسەلەسىن جوسپارلى وتىرىستا تالقىلاۋى ءتيىس. «ەگەر دەپۋتاتتار وتىرىستا بۇل ماسەلەنى كۇن تارتىبىنە قويماسا، باسقا دا ارىپتەستەر ول جايىندا مىندەتتى تۇردە ايتاتىن بولادى» دەپ ءسوزىن تۇيىندەدى اشىمبايەۆ مىرزا.
توق ەتەرى، ماۋلەن اشىمبايەۆ قازاقستانداعى جانارماي تاپشىلىعى ءۇشىن ايتارلىقتاي سەبەپتىڭ جوق ەكەندىگىن اشىق ايتتى.
