اقپارات جانە كوممۋنيكاسيالار ءمينيسترى داۋرەن ابايەۆ ءوزىنىڭ بۋەنوس-ايرەستەگى جۇمىس ساپارىندا ەلەكتر بايلانىسىن دامىتۋ بويىنشا بۇكىلالەمدىك كونفەرەنسيا شەڭبەرىندە ەكىجاقتى كەزدەسۋلەر وتكىزدى، دەپ جازادى Qamshy.kz اقپارات اگەنتتىگى. 

مينيستر 8 قازاندا حالىقارالىق ەلەكتر بايلانىسى وداعىنىڭ باس حاتشىسى ح. دجاومەن كەزدەستى. كەزدەسۋدە قازاقستاننىڭ اۋىلدىق ەلدى مەكەندەرىن وپتيكالىق-تالشىقتى جەلىلەرمەن قامتۋ ماسەلەسى تالقىلاندى.

سونىمەن قاتار، د. ابايەۆ جاپونيانىڭ ىشكى ىستەر جانە كوممۋنيكاسيالار مينيسترلىگىنىڭ ۇيلەستىرۋ جانە حالىقارالىق بايلانىس جونىندەگى ۆيسە-مينيسترى ماساحيرو توميناگامەن كەزدەستى. ەكىجاقتى كەزدەسۋ بارىسىندا اقپارات، اقپاراتتىق-كوممۋنيكاسيالىق ينفراقۇرىلىم جانە ينتەرنەتتەگى زاڭسىز كونتەنتكە قارسى تۇرۋ ماسەلەلەرى تالقىلاندى. 

«جاپونيا – بۇقارالىق اقپارات قۇرالدارىن دامىتۋ سالاسىندا مول تاجىريبەسى بار ەلدىڭ ءبىرى. اسىرەسە ءبىزدى جاپونيانىڭ وسى سالاداعى زاڭناماسىن دامىتۋ جولدارى قىزىقتىرادى. بۇگىن جاپونيانىڭ تەلەكونتەنتى الەمدە اقش-تان سوڭ 2ء-شى ورىندا تۇر. سونداي-اق ءبىز جاپونيانىڭ سيفرلىق حابار تاراتۋ سالاسىنداعى تاجىريبەسىمەن دە تانىسقىمىز كەلەدى»، – دەدى مينيستر د. ابايەۆ.