ەلگە ورالىپ، تاراز قالاسىنان «ىقتيار حات» العان قانداستارىمىزدىڭ باسى داۋعا قالعانىن حابارلاعانبىز. دەلدالداردىڭ قۇرىعىنا ىلىنگەن 251 ادام نە قازاقستاننىڭ ازاماتتىعىن الا الماي، نە قىتايعا بارا الماي ابدەن قينالعان بولاتىن.
وسى ماسەلەگە بايلانىستى 9 قاراشادا جامبىل وبلىستىق ءىىد باسشىسىنىڭ تاپسىرماسى بويىنشا، تاراز قالاسىندا 251 قانداستىڭ ماسەلەسى بويىنشا دوڭگەلەك ۇستەل ءوتتى. وسى جيىنعا «ىقتيار حات» داۋىنا ىلىككەن 30-دان استام قانداسىمىز باردى. بۇل تۋرالى Qamshy.kz اقپارات اگەنتتىگىنىڭ ءتىلشىسى حابارلايدى.
تاراز قالاسىنا بارعان كەزدە قۋانىشتى حاباردى ەستىپ، توبەمىز كوككە جەتكەندەي قۋاندىق. جامبىل وبلىستىق ءىىد باسشىسىنىڭ ورىنباسارى ءبايىسوۆ رۋسلان ءابدىعاپپار ۇلىنىڭ حابارلاۋى بويىنشا، قانداستارىمىز ءوز تۇراتىن ەلدى-مەكەننەن ازاماتتىق الا الاتىن بولدى. سول ساتتەگى قانداستارىمىز بەن جاناشىر ازاماتتاردىڭ قۋانىشىن سوزبەن جەتكىزۋ تىپتەن مۇمكىن ەمەس. تارازدان قايتقان كەزدە قانداستارىمىزدىڭ ءانۇراندى بىرگە شىرقاۋىنان-اق ولاردىڭ تۋعان ەلگە، وتانعا دەگەن ايرىقشا سەزىمىن، ىستىق ىقىلاسىن بايقاۋعا بولادى. ەندىگى كەزەكتە ولارعا قاجەتتى قۇجاتتاردى جيناستىرىپ، ازاماتتىعىن الۋ عانا قالدى.
ايتا كەتەرلىگى دەلدالعا ۇرىنعان 251 ەتنيكالىق قازاق قازىرگى ۋاقىتتا ءار جەردە ءجۇر. سونى پايدالانعان كەيبىر "قۇتقارۋشى" دەلدالدار قانداستارىمىزدىڭ قالتاسىن تاعى قاعۋى مۇمكىن. سوندىقتان تارازداعى «ىقتيار حات» داۋىنا قاتىستى 70-80 ادامنان قۇرالعان توپ بار ەكەنىن ەستەرىڭىزگە سالامىز. اتالعان توپتىڭ ۇيىمداستىرۋشىسى — باقىت قۇرماش ەسىمدى ازامات. ەگەر قاندايدا ءبىر سۇراقتار بويىنشا جاۋاپ العىسى كەلگەن ازاماتتار بولسا تومەندەگى نومىرگە حابارلاسۋىن سۇرايمىز.
باقىت قۇرماش: 87077831527؛ 87788831527
