قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ سوچي قالاسىندا ءوتىپ جاتقان تمد-عا مۇشە مەملەكەتتەردىڭ باسشىلارى كەڭەسىنە قاتىسىپ جاتىر، دەپ Qamshy.kz اقپارات اگەنتتىگى قازاقپاراتقا سىلتەمە جاساپ  حابارلايدى.

سالەمدەسۋ جانە بىرگە فوتوسۋرەتكە ءتۇسۋ راسىمىنەن كەيىن مەملەكەت باسشىلارى شاعىن جانە كەڭەيتىلگەن قۇرامدا وتىرىس وتكىزەدى. ءسامميتتىڭ كۇن تارتىبىنە دوستاستىق اياسىندا ءوزارا ءتيىمدى سەرىكتەستىكتى بۇدان ءارى تەرەڭدەتۋ، سونىمەن قاتار ونى قازىرگى زاماننىڭ تالاپتارىنا بەيىمدەۋ ماسەلەلەرى ەنگىزىلگەن. مەملەكەت باسشىلارى وتباسى ينيستيتۋتى مەن ءداستۇرلى وتباسىلىق قۇندىلىقتاردى قولداۋ تۋرالى مالىمدەمە جاسايتىن بولادى.

سامميت بارىسىندا مەملەكەت باسشىلارى ارمەنيانىڭ گوريس، بەلارۋستىڭ برەست جانە قازاقستاننىڭ شىمكەنت قالالارى سەكىلدى ءىرى شاھارلار ارقىلى مەملەكەتارالىق «ىنتىماقتاستىقتىڭ مادەني استاناسى» باعدارلاماسىن جۇزەگە اسىرۋ تۋرالى شەشىم قابىلدايدى دەپ كۇتىلىپ وتىر. سونىمەن بىرگە، پرەزيدەنتتەر قاۋىپسىزدىك، قورعانىس، سىبايلاس جەمقورلىققا قارسى كۇرەس، بەيبىت ماقساتتا عارىشتى زەرتتەۋ جانە قولدانۋ، مادەني-گۋمانيتارلىق سەرىكتەستىك سالالارى بويىنشا قارىم-قاتىناستى كۇشەيتۋ ماسەلەلەرىنە نازار اۋدارىپ، 2018 جىلى تمد-نىڭ ءتوراعالىعى ماسەلەسىن تالقىلايدى.

سونداي-اق مەملەكەت باسشىلارى تمد-نىڭ جوعارعى ورگاندارىنىڭ قۇزىرەتتەرىن جىكتەۋگە باعىتتالعان ءبىرقاتار شەشىمدەرگە قول قويۋ جوسپارلانعان. بۇل قۇجاتتاردى قابىلداۋ ارقىلى مەملەكەت باسشىلارىنىڭ كەڭەسى سايكەسىنشە قۇزىرەتتەردى ۇكىمەت باسشىلارىنىڭ كەڭەسىنە، سىرتقى ىستەر مينيسترلەرىنە، قورعانىس ۆەدومستۆولارى مەن ەكونوميكالىق كەڭەسكە تابىستاي وتىرىپ، ىنتىماقتاستىقتىڭ دامۋ ستراتەگياسىنىڭ نەگىزگى ماسەلەلەرىن تالقىلاي الادى. ايتا كەتەرلىگى، 2015 جىلى تمد ەلدەرىنىڭ بۋرابايدا وتكەن سامميتىندە قازاقستان پرەزيدەنتى نۇرسۇلتان نازاربايەۆ تمد-نى ترانسوفورماسيالاۋ باستاماسىن كوتەرگەن بولاتىن. بۇدان كەيىنگى بىشكەكتە وتكەن كەلەسى كەزدەسۋدە ىنتىماقتاس ەلدەردىڭ باسشىلارى اتالعان ينتەگراسيالىق بىرلەستىكتى قازىرگى زاماننىڭ تالابىنا سايكەس بەيىمدەۋ تۋرالى شەشىم قابىلداعان.