كەشە  م.اۋەزوۆ اتىنداعى قازاق مەملەكەتتىك اكادەميالىق دراما تەاترى 92ء-شى  ماۋسىمىنىڭ اشىلۋىنا وراي ەلباسى ن.ءا.نازاربايەۆتىڭ «رۋحاني جاڭعىرۋ» باعدارلاماسىنىڭ جانە ۇلى جازۋشى م.اۋەزوۆتىڭ 120 جىلدىعى اياسىندا  «تەاتر الەمىندەگى رۋحاني جاڭعىرۋ»  اتتى الماتى قالاسىنداعى 8 تەاتردىڭ باسىن قوسقان كورمەنى سالتاناتتى تۇردە اشتى دەپ حابارلايدى Qamshy.kz اقپارات اگەنتتىگى.

كورمەنىڭ اشىلۋ سالتاناتىندا اۋەزوۆ تەاترىنىڭ كوركەمدىك جەتەكشىسى، قازاقستاننىڭ ەڭبەك ەرى، كسرو حالىق ءارتيسى ءاسانالى ءاشىموۆ قۇتتىقتاۋ لەبىزىن جەتكىزدى. ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ ديرەكتورى ءسابيت ءابدىحالىقوۆ، اباي اتىنداعى قازاق مەملەكەتتىك اكادەميالىق وپەرا جانە بالەت تەاترى ديرەكتورىنىڭ ورىنباسارى قانات قاراجانوۆ ۇجىمدارىنىڭ اتىنان اق پەيىل، اقجارما تىلەكتەرىن جەتكىزدى.

قۇتتىقتاۋ سوزدەرىنەن سوڭ كورمەنىڭ لەنتاسى قيىلىپ، اۋەزوۆ تەاترى «مۋزەي» ءبولىمىنىڭ جەتەكشىسى نارگيز تامابەك قىزى كورمەگە قويىلعان قۇندى جادىگەرلەرمەن تانىستىردى.

بۇل كورمەنىڭ ماقساتى –  وسكەلەڭ ۇرپاققا، تەاتر ونەرىنە  قىزىعاتىن ىزدەنۋشىلەرگە، جالپى ونەرسۇيگىش قاۋىمعا قازاق ونەرىنىڭ قاراشاڭىراعى، 92 جىلدىق تاريحى بار م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ قۇرىلعان كەزەڭىنەن باستاپ بۇگىنگى كۇنگە دەيىنگى ونەر شەجىرەسىنەن سىر شەرتىپ جانە الماتى قالاسىندا ورنالاسقان مادەني وردالاردىڭ باسىن قوسۋ ارقىلى ولاردىڭ تاريحىن ءبىر ارنادا توعىستىرىپ، تەاتر مۋزەيىنىڭ تىنىس-تىرشىلىگىنەن حابار بەرە وتىرىپ، مول مۇرا، قۇندى جادىگەرلەرى تۋرالى  ماعلۇمات بەرۋ.

كورمەگە قازاق ونەرىنىڭ قاراشاڭىراعى – م.اۋەزوۆ اتىنداعى قازاق مەملەكەتتىك اكادەميالىق دراما تەاترى، اباي اتىنداعى قازاق مەملەكەتتىك اكادەميالىق وپەرا جانە بالەت تەاترى، عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى، رەسپۋبليكالىق نەمىس دراما تەاترى، مەملەكەتتىك رەسپۋبليكالىق كورەي مۋزىكالىق كومەديا تەاترى، ن.ساس اتىنداعى مەملەكەتتىك ورىس بالالار مەن جاسوسپىرىمدەر تەاترى، ق.قوجامياروۆ اتىنداعى ۇيعىر مۋزىكالىق كومەديا تەاترى جانە  م.يۋ. لەرمونتوۆ اتىنداعى مەملەكەتتىك اكادەميالىق ورىس دراما تەاترىنىڭ قۇندى جادىگەرلەرى قويىلدى.

8 تەاتر مۋزەيىنىڭ باسىن قوسىپ كورمە ۇيىمداستىرۋدىڭ ماقساتى – ۇلت رۋحانياتىنىڭ تۇتاستىعىن تۋ قىلىپ، ەلىمىزدەگى بارلىق تەاترلاردىڭ مۋزەيىندەگى قۇندىلىقتار مەن جادىگەر-مۇرالاردىڭ باسىن بىرىكتىرەتىن رەسپۋبليكالىق دەڭگەيدە كورمە ۇيىمداستىرۋ. بۇل قازاق تەاتر ونەرىندەگى ۇلتتىق قازىنامىزدىڭ قاينار بۇلاعى، جاڭعان شىراعى بولماق.