قىرعىز رەسپۋبليكاسىنىڭ پرەمەر-مينيسترى س.يساكوۆتىڭ 2017 جىلدىڭ 11 قازانىندا Facebook الەۋمەتتىك جەلىسىنىڭ جەكە پاراقشاسىندا قىرعىز-قازاق مەملەكەتتىك شەكاراسىنداعى اعىمداعى جاعداي بويىنشا ءوزىنىڭ قازاقستان رەسپۋبليكاسىنىڭ پرەزيدەنتىمەن كەلىسسوزدەرى تۋرالى اقپاراتىنا قاتىستى ءبىرقاتار باق-تىڭ ساۋالدارىنا بايلانىستى ق ر پرەمەر-مينيسترىنىڭ باسپا ءسوز قىزمەتى رەسمي تۇردە مالىمدەيدى، دەپ Qamshy.kz اقپارات اگەنتتىگى ق ر پرەمەر-مينيسترىنىڭ رەسمي سايتىنا سىلتەمە جاساپ حابارلايدى.

بىرىنشىدەن، سوچيدە (رف) جوعارى ەۋرازيالىق ەكونوميكالىق كەڭەس وتىرىسىنىڭ اياسىندا قازاقستان پرەزيدەنتى مەن قىرعىزستان پرەمەر-مينيسترىنىڭ كەلىسسوزدەرى وتكىزىلگەن جوق. س.يساكوۆ مىرزانىڭ جەكە Facebook پاراقشاسىندا ورنالاستىرىلعان فوتوسۋرەتتە راستالعانداي، ونىڭ ءبىزدىڭ ەلباسىمىزعا جاقىنداپ كەلۋى عانا ورىن الدى.

ەكىنشىدەن، قازاقستان پرەزيدەنتىنىڭ «شەكارادا تۋىنداعان بارلىق ماسەلەلەردى شەشۋ بويىنشا قازاقستان ۇكىمەتىنە تاپسىرما بەرگەندىگى» تۋرالى اقپارات شىندىققا جاناسپايدى. اقيقاتىندا، ۇكىمەتكە اتالعان ماسەلە بويىنشا ۇكىمەتارالىق كونسۋلتاسيا وتكىزۋ تۋرالى تاپسىرما بەرىلدى.

بۇدان بۇرىن قازاقستاندىق باق-تا حابارلانعانداي، قازىرگى كەزدە قازاقستان رەسپۋبليكاسىنىڭ ۇقك شەكارا قىزمەتى قازاقستاندىق ءىىم، مەملەكەتتىك كىرىستەر جانە كولىكتىك باقىلاۋ كوميتەتتەرىمەن بىرلەسە وتىرىپ، ەلىمىزدىڭ مەملەكەتتىك شەكاراسىنىڭ بارلىق پەريمەترى بويىنشا، ونىڭ ىشىندە قازاقستاندىق-قىرعىز اۋماعىندا دا جوسپارلى شەكارا وپەراسياسىن جۇرگىزۋدە. شەكارادان وتەتىن جەكە تۇلعالاردى، كولىك قۇرالدارىن، جۇكتەر مەن تاۋارلاردى تەكسەرۋدى كۇشەيتۋ شارالارى قولدانىستاعى زاڭناما شەڭبەرىندە قازاقستاندىق جانە شەتەلدىك ازاماتتاردىڭ قۇقىقتارىن شەكتەۋسىز جۇرگىزىلۋدە. شەكارانى كەسىپ ءوتۋ ءۇشىن ەشقانداي شەكتەۋ نەمەسە تىيىم سالىنىپ جاتقان جوق.

جوسپارلى شەكارا وپەراسياسىنىڭ باستى ماقساتى – شەكارالىق كەڭىستىكتەگى قۇقىققا قارسى ارەكەتتەردىڭ الدىن الۋ، تەرروريستىك، كونتراباندالىق جانە باسقا دا قىلمىستىق ارەكەتتەرگە قاتىسى بار تۇلعالاردى انىقتاۋ، شەكارا ءتارتىبى مەن كوشى-قون زاڭناماسىنىڭ ساقتالۋىن تەكسەرۋ.

ءوز كەزەگىندە قىرعىز رەسپۋبليكاسىنىڭ شەكارا قىزمەتى قىرعىزستان پرەزيدەنتى سايلاۋىنا دايىندىق جانە ونى وتكىزۋ كەزەڭىندە شەكارالىق باقىلاۋدىڭ كۇشەيتىلگەن تارتىبىنە كوشتى.

قازاقستان رەسپۋبليكاسى پرەمەر-مينيسترىنىڭ باسپا ءسوز قىزمەتى بۇرمالانعان اقپاراتتىڭ تاراتىلۋىنا رەسمي تۇردە تۇسىنبەستىك بىلدىرەدى جانە ءوزىنىڭ شىنايى اقپارات بەرۋ ماسەلەسىندە كەز كەلگەن باق-پەن ىنتىماقتاستىققا اشىقتىعىن راستايدى.