قازاقستان پرەزيدەنتى رەسەي فەدەراسياسىنىڭ پرەزيدەنتى ۆلاديمير پۋتينمەن كەزدەستى. بۇل تۋرالى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ حابارلايدى.
كەزدەسۋ بارىسىندا مەملەكەت باسشىلارى ەكىجاقتى ىنتىماقتاستىقتىڭ وزەكتى ماسەلەلەرىن جانە ونى ودان ءارى دامىتۋ پەرسپەكتيۆاسىن تالقىلادى.
نۇرسۇلتان نازاربايەۆ رەسەي قازاقستاننىڭ ەكونوميكاداعى جانە باسقا دا سالالارداعى ماڭىزدى ستراتەگيالىق ارىپتەسى بولىپ سانالاتىنىن اتاپ ءوتتى.
– بيىل ەكى ەل اراسىنداعى ديپلوماتيالىق قارىم-قاتىناستىڭ ورناعانىنا 25 جىل تولىپ وتىر. وسى جىلى ءوزارا ساۋدا-ساتتىق كولەمى ءۇش ەسە ءوستى. بارلىق باعىتتار بويىنشا جاڭا بىرلەسكەن كاسىپورىندار قۇرىلۋدا، – دەدى مەملەكەت باسشىسى.
قازاقستان پرەزيدەنتى ەكى ەلدىڭ ەۋرازيالىق ەكونوميكالىق وداق اياسىنداعى ىنتىماقتاستىعى ناتيجەلى بولىپ وتىرعانىن ايتتى.
– ورىن العان قيىندىقتارعا قاراماستان، ءبىز العا جىلجىپ كەلەمىز. قازاقستان – رەسەيدىڭ ەڭ سەنىمدى ءارى جاقىن سەرىكتەسى. سونىمەن قاتار، بايقوڭىر كەشەنىنە قاتىستى ارىپتەستىگىمىزدىڭ دامىپ كەلە جاتقانىن اتاپ وتكەن ءجون، – دەدى نۇرسۇلتان نازاربايەۆ.
سونداي-اق، ەكى ەلدىڭ باسشىلارى الداعى كەزدەسۋلەر كەستەسىن تالقىلاپ، وڭىرلىك ساياساتتىڭ مەيلىنشە وزەكتى ماسەلەلەرىنە توقتالدى.
ۆلاديمير پۋتين مەملەكەتارالىق بايلانىستاردى دامىتۋدىڭ جانە نىعايتۋدىڭ باستى فاكتورى سانالاتىن ەكىجاقتى كەزدەسۋلەردىڭ ماڭىزدىلىعى مەن ناتيجەلىلىگى جونىندە ايتتى.
