12 قازاندا قازاقستان پرەزيدەنتى تمد-عا مۇشە مەملەكەتتەر باسشىلارى كەڭەسىنىڭ جانە جوعارى ەۋرازيالىق ەكونوميكالىق كەڭەستىڭ وتىرىستارى اياسىنداعى كەلىسسوزدەردى قورىتىندىلادى، دەپ جازادى Qamshy.kz اقپارات اگەنتتىگى.
بۇل تۋرالى اقوردانىڭ باسپا ءسوز قىزمەتى حبارلادى.
– الداعى كەزەڭدە اتقارىلاتىن جۇمىستاردىڭ جوسپارى بەلگىلەندى. ەلدەرىمىزدەگى سيفرلاندىرۋ ماسەلەسىنە قاتىستى پەرسپەكتيۆالى باعىتتاردى ايقىندادىق. قازاقستان، رەسەي جانە بەلارۋس اراسىندا وسى سالادا بىرلەسە جۇمىس جۇرگىزۋ جونىندە ۋاعدالاستىققا قول جەتكىزىلدى، – دەدى نۇرسۇلتان نازاربايەۆ.
مەملەكەت باسشىسى كەلەسى جىلى قازاقستاندا سيفرلاندىرۋ ماسەلەلەرى جونىندە كەزدەسۋ وتكىزۋ جوسپارلانعانىن ايتتى.
بۇدان بولەك، قازاقستان پرەزيدەنتى گەرمانيالىق بيزنەسمەندەرمەن وتكەن كەزدەسۋدىڭ ناتيجەلەرى تۋرالى اڭگىمەلەدى. وندا قازاقستان-گەرمانيا قارىم-قاتىناستارىن ەكونوميكانىڭ ءتۇرلى سالالارى بويىنشا ىلگەرىلەتۋ جونىندە ۋاعدالاستىققا قول جەتكىزىلدى.
سونداي-اق نۇرسۇلتان نازاربايەۆ ۆلاديمير پۋتينمەن بولعان كەزدەسۋدىڭ ماڭىزدىلىعىنا توقتالدى.
– رەسەي مەن قازاقستان اراسىنداعى قارىم-قاتىناس ەڭ جوعارى دەڭگەيدە. بايقوڭىرعا قاتىستى باعدارلامانى بىرلەسە ىسكە اسىرۋ جونىندە ۋاعدالاستىق. سونىمەن قاتار، وزبەكستانعا مۇناي قۇبىرىن سالۋ جوسپارلانىپ وتىر. سول ءۇشىن ءتيىستى جۇمىس اتقارىلۋى كەرەك،– دەدى قازاقستان پرەزيدەنتى.
مەملەكەت باسشىسى كەلىسسوزدەر بارىسىندا ەۋرازيا كولىك ءدالىزىن دامىتۋعا بايلانىستى قازاقستاننىڭ كولىك-ترانزيت الەۋەتىن ودان ءارى پايدالانۋ ماسەلەسى دە تالقىلانعانىن اتاپ ءوتتى.
