قىرعىزستان پرەزيدەنتى المازبەك اتامبايەۆ قازاقستانمەن شەكارادا قالىپتاسقان جاعدايدى «شەكتەن شىعۋشىلىق» دەپ اتادى. اتامبايەۆ بۇل جايىندا باتكەندە اسكەري قىزمەتكەرلەرگە ارنالعان ءۇيدىڭ اشىلۋ سالتاناتىندا ايتقان. بۇل تۋرالى Qamshy.kz اقپارات اگەنتتىگى ازاتتىق سايتىنا سىلتەمە بەرە وتىرىپ حابارلايدى.

«ءقازىر مەن قىرعىزستاننىڭ وبلىستارىن ارالاپ، پرەزيدەنت رەتىندە سوڭعى كەزدەسۋلەرىمدى وتكىزىپ ءجۇرمىن. كەشە وشتا، الدىڭعى كۇنى تالاستا بولدىم، بۇگىن باتكەندەمىن. ارينە، وسى كۇندەرى قىرعىز-قازاق شەكاراسىندا ەۋرازيا ەكونوميكالىق وداعىنىڭ بارلىق كەلىسىمدەرى مەن نورمالارى بۇزىلىپ جاتقان شەكتەن شىعۋشىلىقتى باقىلاپ وتىرمىن»،- دەدى قىرعىزستان پرەزيدەنتى.

اتامبايەۆ «قىرعىز حالقىنىڭ 3 مىڭ جىلدىق تاريحى بارىن» ايتىپ، «مۇنداي حالىقتىڭ ءۇش كۇندىك بلوكادادان قورىقپايتىنىن» مالىمدەگەن. «ءۇش مىڭ جىلدىق تاريحى بار حالىق، مەنىڭشە، ءۇش كۇندىك وقشاۋلاۋدان ەشقاشان قورىقپايدى جانە اقشاعا، قىسىم مەن قوقان-لوقىعا بولا شەتەلدىڭ يتارشىلارىن ەشقاشان سايلامايدى... ءبىز 2010 جىلى دا ءبىر جارىم اي بلوكادانى، حالىقتىڭ قينالعانىن كورگەنبىز. ءبىز بۇگىنگى زاڭسىزدىقتان دا امان شىعامىز، ءبىراق ءبىز تاۋەلسىزدىگىمىزدى قورعايمىز»،- دەدى اتامبايەۆ.

10 قازاننان بەرى ەكى ەل اراسىنداعى شەكارا بەكەتىندە ۇزىن-سونار كەزەك پايدا بولىپ، قازاقستان تارابى تەكسەرۋ امالدارىن كۇشەيتكەن بولاتىن. مۇنىڭ الدىندا، قازاننىڭ 7ء-سى كۇنى المازبەك اتامبايەۆ بىشكەك ماڭىنداعى الا-ارچا مەملەكەتتىك رەزيدەنسياسىندا ەل ازاماتتارىنا مەملەكەتتىك ناگرادالار تاپسىرۋ راسىمىندە سويلەگەن سوزىندە قىرعىزستان پرەزيدەنتى سايلاۋىنا قاتىسىپ جاتقان جەكەلەگەن كانديداتتارمەن بىرگە قازاقستان بيلىگىن دە سىناعان بولاتىن.

شەكاراداعى جاعدايعا قاتىستى رەسمي تۇسىندىرمە دەر كەزىندە بەرىلمەي، جۇرت جاعدايدى اتامبايەۆتىڭ قازاقستان بيلىگىن سىناۋىمەن بايلانىستىراتىن بولجامدار جاساعان. 11 قازان كۇنى كەشكە قازاقستان ۇقك شەكارا قىزمەتى «مەملەكەتتىك شەكارا بويىنشا جوسپارلى شەكارا وپەراسياسى جۇرگىزىلىپ جاتقانىن» حابارلاعان.