كحدر يادرولىق قارۋعا تولىق تىيىم سالۋ تۋرالى يدەيانى قولدايدى، الايدا ولار اقش يەلىك ەتىپ وتىرعان كەزدە ءوز ارسەنالىن ساقتاپ قالۋعا نيەتتى. بۇل جايىندا بۇۇ-دا سولتۇستىك كورەيا وكىلى كيم ين رەن مالىمدەدى، دەپ حابارلايدى Qamshy.kz اقپارات اگەنتتىگى ريا نوۆوستي سايتىنا سىلتەمە جاساپ. سونىمەن قاتار، ول يادرولىق سوعىستىڭ كەز كەلگەن ۋاقىتتا باستالىپ كەتۋى مۇمكىن ەكەندىگىن ايتتى.
بۇۇ-نىڭ جالپى جينالىسىندا ديپلومات يادرولىق قارۋعا تولىق تىيىم سالۋ تۋرالى شىلدە كونۆەنسياسىنا قولداۋ ءبىلدىرىپ، بۇل قۇجاتقا ۆاشينگتوننىڭ قارسى ەكەندىگىن ايتىپ ءوتتى.
«كحدر يادرولىق قارۋدىڭ تولىق جويىلۋىن جانە بۇكىل الەمنىڭ يادرولىق قارۋى جويۋعا باعىتتالعان كۇش-جىگەرىن دايەكتى تۇردە قولدايدى. الايدا اقش كحدر-نى يادرولىق قارۋمەن قورقىتىپ، شابۋلى جاساپ وتىر جانە دە ولار يادرولىق قارۋعا تىيىم سالۋ تۋرالى قۇجاتتى تەرىسكە شىعارىپ وتىرعاندىقتان سولتۇستىك كورەيا بۇل كەلىسىمگە قوسىلمايدى»، - دەيدى ول.
ديپلوماتتىڭ ايتۋىنشا، پحەنيانداعى يادرولىق قارۋ مەن بالليستيكالىق زىمىراندار وزدەرىن قورعاي ءۇشىن ساقتاپ وتىرعان قارۋ ەكەندىگى ءمالىم بولعان. «الەمدە ەشبىر مەملەكەت اقش تاراپىنان ۇزاق ۋاقىت بويى مۇنداي قىسىم مەن يادرولىق قارۋمەن قورقىتۋلارعا تاپ بولماعان. سولتۇستىك كورەياداعى جاعداي ابدەن تيتىقتالىپ، ءوز شەگىنە جەتىپ، سوندىقتان دا يادرولىق سوعىس كەز كەلگەن ۋاقىتتا باستالىپ كەتۋى مۇمكىن»، - دەپ قوسا ايتىپ ءوتتى ديپلومات.
«اقش تاراپى ءتوندىرىپ وتىرعان ءقاۋىپ پەن سوعىس ءورتى تۇتانۋى مۇمكىن سەبەپتەر تولىعىمەن جويىلماعانشا، ءبىز ءوزىمىزدىڭ بالليستيكالىق زىمىراندارىمىز بەن يادرولىق قارۋىمىزعا بايلانىستى ەشقانداي دا كەلىسىمشارتتار جۇرگىزبەيمىز جانە ەشقاشان دا ءوزىمىز تاڭداعان جولدان تايىنبايمىز»، - دەيدى كيم ين رەن. ونىڭ ايتۋىنشا، وسى جىلى كحدر «ەلدەردىڭ يادرولىق كۇشتەرىن قالىپتاستىرۋداعى سوڭعى كەزەڭدى ءوتتى»، ەندى كحدر اتوم بومباسى، سۋ تەگى بومباسى جانە كونتينەنتارالىق زىمىرانداردى تاسىمالداۋدىڭ ءتۇرلى تاسىلدەرىنە يە بولدى.
«اقش-تىڭ بارلىق اۋماعى ءبىزدىڭ زىمىرانداردىڭ ايماعىندا جانە ەگەر دە اقش ءبىزدىڭ جەرىمىزگە كىشكەنتاي بولسىن ءقاۋىپ توندىرەتىن بولسا، ءبىزدىڭ قاتاڭ جازامىزدان قاشىپ قۇتىلا المايدى»، - دەپ سەنىمى تۇردە ايتتى ديپلومات.
