قازاقستان رەسپۋبليكاسىنىڭ ءدىن ىستەرى جانە ازاماتتىق قوعام ۆيسە-مينيسترى بەرىك ارىن الماتى وبلىسىنا جۇمىس ساپارى بارىسىندا «زايىرلى قوعام جانە جوعارى رۋحانيات –حالىق بىرلىگىنىڭ نەگىزى» تاقىرىبىندا رەسپۋبليكالىق سەمينار-كەڭەستىڭ وتىرىسىنا قاتىستى. بۇل تۋرالى Qamshy.kz اقپارات اگەنتتىگى حابارلايدى.
شاراعا ورتالىق جانە جەرگىلىكتى مەملەكەتتىك ورگانداردىڭ وكىلدەرى، جوو-نىڭ رەكتورلارى، ءدىني بىرلەستىكتەر مەن ەتنو-مادەني ورتالىق وكىلدەرى، بارلىعى 450 ادام قاتىستى.
بەرىك ارىن ءوز سوزىندە قازاقستان رەسپۋبليكاسىنىڭ ءدىن سالاسىنداعى مەملەكەتتىك ساياساتىنىڭ 2017 – 2020 جىلدارعا ارنالعان تۇجىرىمداماسىنىڭ، سونداي-اق، «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءدىني قىزمەت جانە ءدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ نەگىزگى باسىمدىقتارى تۋرالى اڭگىمەلەدى.
«ءدىني سالاداعى تۇراقتىلىق - قوعامدىق-ساياسي جاعداي مەن مەملەكەتتىڭ قاۋىپسىزدىگى ءۇشىن ماڭىزدى. ەلدەگى تۇراقتىلىق مەملەكەتتىك ساياساتتىڭ ءساتتى جۇزەگە اسىرىلۋىنا نەگىز بولادى، سونداي-اق، ەلدىڭ ودان ءارى دامۋىنىڭ ۆەكتورى ايقىندالادى»، - دەدى ۆيسە-مينيستر.
جۇمىس ساپارى بارىسىندا ۆيسە-مينيستر اتىراۋ، اقتوبە، قوستاناي، اقمولا، پاۆلودار، قىزىلوردا، جامبىل، باتىس قازاقستان، شىعىس قازاقستان، وڭتۇستىك قازاقستان وبلىستارى مەن الماتى قالاسىنىڭ ءدىن ىستەرى باسقارمالارىنىڭ باسشىلارىمەن، ءدىن سالاسىنداعى ماسەلەلەردى زەرتتەۋ ورتالىقتارىنىڭ ديرەكتورلارىمەن كەڭەس وتكىزدى. سونداي-اق، جيىنعا قۇقىق قورعاۋ ورگاندارىنىڭ وكىلدەرى مەن لاڭكەستىككە قارسى كوميسسيالاردىڭ جاۋاپتى ماماندارى قاتىستى.
سونداي-اق، ۆيسە-مينيستر ءدىني ماسەلەلەر بويىنشا رەسپۋبليكالىق ءاقپاراتتىق-تۇسىندىرۋ توپتارىنىڭ (راتت) جۇمىسىن سارالاپ، وسىنىڭ اياسىندا قمدب ايماقتىق فيليالدارىنىڭ يمامدارىمەن، وڭىرلەردەگى ءدىن ىستەرى جونىندەگى باسقارما باسشىلارىمەن جانە ايماقتىق پروبلەمالاردى زەرتتەۋ ورتالىقتارىنىڭ ديرەكتورلارىمەن كەزدەسۋلەر وتكىزدى.
بەرىك ارىن قاتىسۋشىلارعا ءدىني سالاداعى مەملەكەتتىك ساياساتتى ماعىنالى ءتۇسىندىرۋدىڭ، ەلدىڭ دامۋىنىڭ زايىرلى پرينسيپتەرىن جانە كونفەسسياارالىق كەلىسىمدى ناسيحاتتاۋدىڭ، ءدىني ەكسترەميزم مەن راديكاليزمنىڭ الدىن-الۋ جانە حالىقتىڭ كوپ شوعىرلانعان اۋماعىندا راديكالدى يدەولوگياعا قارسى يممۋنيتەتتى قالىپتاستىرۋدىڭ ماڭىزدىلىعىن اتادى.
