قازاقستاندىق بوكسشى بەكمان سويلىبايەۆ ەكىنشى جەڭىل سالماق دارەجەسىندەگى WBC International چەمپيوندىق اتاعىن قورعاۋ ءۇشىن لاس-ۆەگاسقا كەلدى.
ويىن-ساۋىقتىڭ عانا ەمەس، كاسىپقوي بوكستىڭ دا ورداسى سانالاتىن لاس-ۆەگاستا استانا ۋاقىتىمەن جەكسەنبى كۇنى تاڭەرتەڭ Golden Boy Promotion كومپانياسىنىڭ ۇيىمداستىرۋىمەن عاجايىپ جەكپە-جەك كەشى وتەدى. سونىڭ بىرىندە شارشى الاڭعا جەرلەسىمىز بەكمان سويلىبايەۆ شىعىپ، مەكسيكالىق فەرناندو ۆارگاسقا قارسى ايقاستا ەكىنشى جەڭىل سالماق دارەجەسىندەگى WBC International چەمپيوندىق اتاعىن قورعايدى. جەكپە-جەك 10 راۋندقا جوسپارلانىپ وتىر، دەپ جازادى vesti.kz.

ەكى اي لوس-اندجەلەستە وقۋ-جاتتىعۋ جيىنىن وتكىزگەن بەكمان سويلىبايەۆ بۇگىن باپكەرى ەريك براۋن جانە كومەكشىسى باۋىرجان ىزتىلەۋوۆپەن بىرگە لاس-ۆەگاسقا كەلدى.

«شارشى الاڭعا شىعۋعا تولىق دايىنمىن. ەكى ايعا سوزىلعان وقۋ-جاتتىعۋىم وتە پايدالى بولدى. ەريك براۋن مەن تەيلور رامسدەلدەن ۇيرەنگەنىم كوپ. سپاررينگتىك جۇدىرىقتاسۋلار دا از بولعان جوق. ءدال ءقازىر كىممەن بولسا دا جۇدىرىقتاسۋدان قاشپايمىن. WBC International چەمپيوندىق بەلبەۋىمدى ءساتتى قورعاسام، وسى رەيتينگتە ءبىرىنشى ورىندا تۇرعان بوكسشىلارعا قارسى شارشى الاڭعا شىققىم كەلەدى»، – دەيدى بەكمان سويلىبايەۆ.

ەستەرىڭىزگە سالا كەتەيىك، بەكمان سويلىبايەۆ پەن مەكسيكالىق فەرناندو ۆارگاس اراسىنداعى جەكپە-جەكتى ESPN تەلەارناسى ارقىلى الەمنىڭ 200 ەلى تاماشالايدى. ال قازاقستاندا اتالمىش ايقاستى «حابار» تەلەارناسى كورسەتەدى. بۇل جەرلەسىمىزدىڭ كاسىپقوي بوكستاعى 12ء-شى جەكپە-جەگى بولماق. بۇعان دەيىنگىلەردىڭ بارلىعىندا جەڭىسكە جەتىپ، ونىڭ تورتەۋىندە قارسىلاسىن نوكاۋتقا تۇسىرگەن بولاتىن.