15 قازاندا الماتى وبلىسى ىلە اۋدانىنىڭ مۇحامەتجان تۇيمەباي اۋىلىندا حالىق قاھارمانى، ق ر تۇڭعىش قورعانىس ءمينيسترى، ارميا گەنەرالى نۇرماعامبەتوۆ ساعادات قوجاحمەتۇلىن ەسكە الۋعا ارنالعان دجيۋ-دجيتسۋ كۇرەسىنەن اشىق تۋرنير ءوتتى.

اتالمىش تۋرنيرگە الماتى جانە الماتى وبلىسىندا دجيۋ-دجيتسۋمەن اينالىساتىن 5-17 جاس ارالىعىنداعى 150-دەن استام ءجاسوسپىرىم قاتىستى. جۇزدەن جۇيرىك شىققاندار ارنايى ديپلوم، مەدال جانە ارنايى سىيلىقتارمەن ماراپاتتالدى. سونداي-اق تۋرنيرگە كەلگەن قوناقتارعا ەستەلىك سىي رەتىندە نۇرماعامبەتوۆ ساعادات قوجاحمەت ۇلى تۋرالى جازىلعان كىتاپتار تابىستالدى. جاستار دوداسىنىڭ سالتاناتتى اشىلۋ راسىمىندە ءالعىسوز الماتى وبلىسى، ىلە اۋدانى ءماسليحات دەپۋتاتى داۋتالييەۆ عاني ساۋىتبەكۇلىنا بۇيىردى. عاني ساۋىتبەك ۇلى ءوز سوزىندە: «ەلباسىنىڭ «بولاشاققا باعدار: رۋحاني جاڭعىرۋ» ماقالاسىن جۇزەگە اسىرۋ شەڭبەرىندە وسىنداي سپورتتىق شارالار الداعى ۋاقىتتا كوپتەپ ۇيىمداستىرىلادى. سپورت – جاستاردى رۋحاني بايىتىپ، پاتريوتتىق سەزىم قالىپتاستىراتىن بىردەن ءبىر كۇش» - دەپ ايتا كەتتى. ىلە اۋدانىنىڭ دەنە شىنىقتىرۋ جانە سپورت ءبولىمىنىڭ باس مامانى قابدىكارىموۆ جانىبەك بولاتحان ۇلى جانە اششىبۇلاق اۋىلدىق وكرۋگى اكىمىنىڭ ورىنباسارى مەيىرمانوۆ ەرلان سايران ۇلى جارىسقا قاتىسۋشىلارعا ساتتىلىك تىلەدى. جارىستىڭ قۇرمەتتى مەيمانى بولعان ىلە اۋداندىق اۋعان سوعىسىنىڭ ارداگەرلەرى مەن مۇگەدەكتەرىنىڭ ەرىكتى قوعامىنىڭ ءتوراعاسى، «قىزىل جۇلدىز» وردەنىنىڭ يەگەرى قاراجىگىتوۆ مارات جۇبايبەك ۇلى ءتۋرنيردىڭ ماقساتىن جاستارعا تۇسىندىرە كەتتى. ساعادات قوجاحمەت ۇلىنىڭ ەلىنە سىڭىرگەن ەڭبەگى، حالقىنا قىلعان قىزمەتى تۋرالى كەڭىنەن ايتا ءوتتى. بۇل تۋرنير ەرتەڭگى بولاشاعىمىز جاسوسپىرىمدەر ءۇشىن ۇلكەن ونەگە بولعانى ءسوزسىز. 

الەم ارەنالارىندا ەلىمىزدىڭ كوك بايراعىن جەلبىرەتىپ، ءان ۇرانىمىزدى اسقاقتاتىپ جۇرگەن ارالاس جەكپە-جەك جۇلدىزدارى قايرات احمەتوۆ (قازاق) جانە قۋات حاميتوۆ (نايمان) ارنايى قوناق بولىپ شاقىرتىلدى. جاسوسپىرىمدەردى جىگەرلەندىرۋ ماقساتىندا وسى تۋرنيردىڭ ماراپاتتاۋ ءراسىمى قازاقتىڭ «قوس باتىرىنا» بۇيىردى. وسىنداي چەمپيونداردىڭ قولىنان مەدال الۋ جاس سپورتشىلار ءۇشىن ۇلكەن قۋانىش بولعانى اڭىق. 

دجيۋ-دجيتسۋ ەلىمىزگە جاڭادان كەلگەن سپورت ءتۇرى بولعانىنا قاراماستان قارقىندى دامىپ كەلە جاتىر. وعان دالەل، بيىل تۇركىمەنستان استاناسى اشحاباتتا وتكەن ازيا ويىندارىندا دجيۋ-دجيتسۋدان ەلىمىزدىڭ سپورتشىلارى جۇلدەلى ورىندارعا يە بولدى. الەم جانە ازيا چەمپيوناتتارىنان دا دجيۋ-دجيتسۋ پالۋاندارى قۇر قول قايتپايتىنى انىق. وسى سپورت تۇرىنە مەملەكەت تاراپىنان دا ۇلكەن قولداۋ كورسەتىلىپ كەلەدى. ەلىمىزدە جىلىنا بىرنەشە رەت اۋقىمدى دەڭگەيدە حالىقارالىق جارىستار ۇيىمداستىرىلىپ تۇرادى. 

 حالىق قاھارمانى، ق ر تۇڭعىش قورعانىس ءمينيسترى، ارميا گەنەرالى نۇرماعامبەتوۆ ساعادات قوجاحمەتۇلىن ەسكە الۋعا ارنالعان ءتۋرنيردى ۇيىمداستىرعان – ەلىمىزگە تانىمال سپورتشى، گرەپپلينگتەن ازيا چەمپيونى، ارالاس جەكپە-جەكتەن حالىقارالىق «Alash pride» ءتۋرنيرىنىڭ بىرنەشە دۇركىن چەمپيونى، دجيۋ-دجيتسۋدان ق ر چەمپيونى نۇرسۇلتان ورىنباساروۆ. سونداي-اق، نۇرسۇلتان ورىنباساروۆ الماتى وبلىسى، ىلە اۋدانىندا دجيۋ-دجيتسۋ جانە گرەپپلينگ كۇرەسى بويىنشا 80-نەن استام شاكىرت تاربيەلەۋدە. «ۇستازى جاقسىنىڭ – ۇستامى جاقسى» دەمەكشى شاكىرتتەرى دە جارىستاردان جۇلدەلى ورىندارمەن ورالۋدا. اتاپ ايتساق، ءمادي قۇرمانعوجايەۆ، ەلجان ءجۇمادىل ءباا ابۋ-دابي قالاسىندا وتكەن دجيۋ-دجيتسۋدان الەم چەمپيوناتىندا چەمپيون اتاندى. وسىنداي جەتىستىكتەرىنىڭ ارقاسىندا وزگە دە قاتارلاستارىنا ۇلگى بولۋدا، مۇنى كورگەن باسقا جاسوسپىرىمدەر تاراپىنان سپورتقا دەگەن قىزىعۋشىلىق ارتىپ، دجيۋ-دجيتسۋمەن اينالىسۋعا بەت بۇرعان جاستاردىڭ سانى كوبەيۋدە. 

تۋرنير ۇيىمداستىرۋشى نۇرسۇلتان ورىنباساروۆ: «اۋىلدىق جەرلەردە وسىنداي شارالار ءجيى وتكىزىلىپ تۇرۋى شارت. سەبەبى، اۋىل جاستارىنىڭ سپورتقا دەگەن قىزىعۋشىلىعىن ارتتىرادى. ۇلت ماقتانىشى نۇرماعامبەتوۆ ساعادات قوجاحمەت ۇلىنىڭ قۇرمەتىنە ارناپ «ساعادات باتىر» دجيۋ-دجيتسۋ كلۋبىن اشقان بولاتىنمىن. اتالمىش كلۋبتا 80-گە جۋىق جاسوسپىرىمدەر جاتتىعۋ جاساۋدا. الداعى ۋاقىتتا جىلىنا ءبىر رەت دجيۋ-دجيتسۋ كۇرەسىنەن «ساعادات باتىر» حالىقارالىق ءتۋرنيرىن ۇيىمداستىرىپ وتىرۋ جوسپاردا بار. باتىر-لارىمىزدى جاسوسپىرىمدەرگە ناسيحاتتاۋ باپكەرلەردىڭ مىندەتتەرىنىڭ ءبىرى. وسىنداي تۋرنيرلەر ارقىلى ءبىز شاكىرىتتەرىمىزدى رۋحاني بايىتامىز. الەم چەمپيونى اتانۋى ءۇشىن الدىمەن ءوز ەلىنىڭ پاتريوتى بولۋى كەرەك. رۋحى بيىك سپورتشى عانا الەمدىك ارەنالاردى باعىندىرا الادى». 

اۋعان سوعىسىنىڭ ارداگەرى، «قىزىل جۇلدىز» وردەنىنىڭ يەگەرى قاراجىگىتوۆ مارات جۇبايبەك ۇلى ەلىمىزدە سپورتتىڭ دامۋىنا ۇلكەن ۇلەس قوسىپ جۇرگەن، اتالمىش تۋرنير ۇيىمداستىرۋشىسى نۇرسۇلتان ورىنباساروۆتى «ارميا گەنەرالى ساعادات نۇرماعامبەتوۆ» مەدالىن ماراپاتتادى.

سامات مۇرات ۇلى