قىرعىزستان پرەزيدەنتى المازبەك اتامبايەۆ ستۋدەنتتەرگە پرەزيدەنتتىك ستيپەنديا تابىستار كەزدە، قازاق-قىرعىز شەكاراسىنداعى ماسەلەگە نازاربايەۆتىڭ جانىنداعى شەنەۋنىكتەر كىنالى ەكەندىگىن ايتتى، — دەپ حابارلايدى Qamshy.kz اقپارات اگەنتتىگى Sputnik كىرگىزستان سايتىنا سىلتەمە جاساي وتىرىپ.
ەسكە سالا كەتەتىن بولساق، المازبەك اتامبايەۆ وسىدان ءبىراز ۋاقىت بۇرىن قازاقستانداعى بيلىكتى سىنعا العان بولاتىن. وسى جاعدايدان كەيىن 10-شى قازاننان باستاپ قازاقستان قازاق-قىرعىز شەكاراسىنداعى باقىلاۋدى كۇشەيتتى.
«قازاقستاننان باسقا دا كورشى ەلدەر بىزگە قىسىم كورسەتكىسى كەلدى. يسلام كارىموۆتىڭ كەزىندە قىرعىزستاننىڭ كەي ايماعىندا جارتى جىلعا جۋىق گاز بەن جارىق بولمادى. ءبىراق وزبەكستانمەن قازىرگى ارا-قاتىناسىمىز قازاقستانمەن قارىم-قاتىناسقا قاراعاندا الدەقايدا جاقسى. ءبىز جۇڭگو، تاجىكستان ەلدەرىمەن دە جاقسى قارىم-قاتىناستامىز»، — دەدى اتامبايەۆ.
ونىڭ سوزىنە سۇيەنسەك، قازاقستان شەكاراداعى ماسەلە ارقىلى قىرعىزستاندى رەسەيدەن الىستاتۋدى ماقسات ەتىپ وتىر.
«مەنىڭ ويىمشا، نازاربايەۆ بۇل تۋرالى ءتىپتى بىلمەيدى دە. سەبەبى ول بارلىق پرەزيدەنتتەر سەكىلدى قاسىنداعى ءوز قاراباستارىن ويلايتىن شەنەۋنىكتەر مەن باسشىلارعا سەنەدى. سونىمەن بىرگە ولاردىڭ باتىس ەلىندە بانك شوتتارى بار. ولار نازاربايەۆتان كەيىنگى جاعدايدى، ءوز بايلىقتارىن قالاي ساقتاپ قالۋ كەرەكتىگىن ويلاپ وتىر»، — دەپ مالىمدەدى اتامبايەۆ.
«مۇمكىن مەن نازاربايەۆ تۋرالى قىزۋقاندىلىقپەن قاتە پىكىر ايتقان شىعارمىن. بۇل تۋرالى ۇزاق ويلاندىم. نازاربايەۆ تا مەن سەكىلدى اڭقاۋ ادام، ونىڭ ماسەلەلەرى كوپ بولۋى دا ابدەن مۇمكىن. ول قاسىنداعى شەنەۋنىكتەرگە سەنىپ وتىر»، — دەدى المازبەك اتامبايەۆ.
ونىڭ پىكىرىنشە، وليگارحتاردىڭ باستى ماقساتى – اقش ەلىنە جاعىنۋ. سونىمەن بىرگە قىرعىزستان پرەزيدەنتى قازاقستاننىڭ لاتىن الىپبيىنە كوشۋى دە تەگىن ەمەس دەپ سانايدى.
پىكىر قالدىرۋ