قازاقستان مەن قىرعىزستان ۇكىمەتتەرى قازاق-قىرعىز شەكاراسىنان ءوتۋدىڭ تارتىپتەرىن بەلگىلەدى دەپ حابارلايدى Qamshy.kz اقپارات اگەنتتىگى azattyq.org-قا سىلتەمە جاساي وتىرىپ.

قازاقستان پرەمەر-مينيسترى باقىتجان ساعىنتايەۆتىڭ مالىمدەۋىنشە، بۇل تۋرالى ەكى ەل پرەمەرلەرى مەن ۇكىمەت دەلەگاسيالارىنىڭ 18 قازاندا وتكىزگەن كەلىسسوزىندە ۋاعدالاستىق جاسالعان.

كەلىسسوزدە ەكى جاق 19 قازان ساعات 00:00-دەن باستاپ ەكى ەل ەل شەكاراسىندا، اسىرەسە قورداي وتكىزۋ بەكەتىندە جەكە جۇگى بار جەكەلەگەن ادامداردى، تۇراقتى جولاۋشىلار تاسىمالدايتىن كولىكتەردى، جەڭىل كولىكتەردى، بوس كەتىپ بارا جاتقان جۇك كولىكتەرىن ءبىرىنشى كەزەكتە وتكىزىپ جىبەرۋگە ۋاعدالاسقان.

ءتۇن ورتاسىنا دەيىن سوزىلعان كەلىسسوزگە قىرعىزستان پرەمەر-مينيسترى ساپار يساكوۆ باستاعان ۇكىمەت دەلەگاسياسى مەن قازاقستان پرەمەر-مينيسترى باقىتجان ساعىنتايەۆ باستاعان ۇكىمەت مۇشەلەرى قاتىستى. كەلىسسوزدە ەكونوميكالىق پروبلەمالار تالقىلاندى.

"ءبىز بىرىنشىدەن، ەكى جاقتى ەكونوميكالىق قارىم-قاتىناستى تالقىلادىق. ولار ەكى ەلدىڭ شەكارا، ترانسپورت، فيتوسانيتارلىق جانە ۆەتەرينارلىق باقىلاۋ سالالارىنداعى ءوزار ءىس-قيمىلىنا قاتىستى. سونىمەن قاتار كەدەن جانە سالىق پروسەسىن ەۋرازيا ەكونويكالىق وداعى (ەاەو) مەن دۇنيەجۇزىلىك ساۋدا ۇيىمىنىڭ (دسۇ) ءتيىستى نورمالارى مەن ەرەجەلەرىنە ساي باسقارۋعا قاتىستى ماسەلەلەر قارالدى" دەدى ساعىنتايەۆ.

باقىتجان ساعىنتايەۆ كەلىسسوزدە قازاقستاننىڭ كەدەن ورگاندارى قىتايدان تاۋار جەتكىزەتىن قىرعىز تاسىمالداۋشىلارىنىڭ قازاقستاننان ترانزيت ارقىلى وتكەن كەدەندىك راسىمدەۋدى دۇرىس تولتىرمايتىنىن انىقتاپ جاتقانىن ايتتى.

كەلىسسوز قورىتىندىسىندا ەكى ەل پرەمەر-مينيسترلەرىنىڭ ءبىرىنشى ورىنباسارلارى ءتوراعالىق جاسايتىن جۇمىسشى توبىن قۇرىپ، ول توپ بەس جۇمىس كۇنى ىشىندە بىرلەسىپ جول كارتاسىن دايىنداۋعا شەشىم قابىلدانعان. تاراپتار جول كارتاسىن قابىلداعان سوڭ جاسالعان كەلىسىمدەردى تولىق ورىنداۋعا مىندەتتەلمەك.

قىرعىزستانداعى سايلاۋ الدىندا جانە ودان كەيىن ەلدىڭ پرەزيدەنتى المازبەك اتامبايەۆ قازاقستاندىق ارىپتەسى نۇرسۇلتان نازاربايەۆتى سىناپ، بىرنەشە مالىمدەمە جاساعان. مۇنداي نارازىلىققا نازاربايەۆتىڭ قىرعىزستانداعى سايلاۋ الدىندا پرەزيدەنتىككە كانديداتتاردىڭ بىرىمەن كەزدەسكەنى سەبەپ بولعان. بۇدان سوڭ استانا قازاق-قىرعىز شەكاراسىنان ءوتۋ ءتارتىبىن قاتايتىپ، قىرعىزستاندىق اسكەريدى تۇتقىنداپ، ال بىشكەك تالاس سۋ قويماسىنىڭ سۋىن جىبەرەتىنىن ەسكەرتكەن.