جاڭا عانا قىرعىزستان پرەمەر-مينيسترى ساپار يساكوۆ باستاپ كەلگەن قۇرامىندا 30-عا جۋىق وكىلەتتى مۇشەسى بار رەسمي دەلەگاسيامەن كەلىسسوزدەر اياقتالدى.
بۇل ساپار قىرعىز تارابىنىڭ باستاماسى بويىنشا تەلەفون ارقىلى بولعان اڭگىمەنىڭ قورىتىندىسى نەگىزىندە ءوتتى. كەلىسسوز ەكونوميكالىق ماسەلەلەر بويىنشا جان-جاقتى تالقىلاۋلارمەن باستالدى.
بىرىنشىدەن، ءبىز ەكىجاقتى ەكونوميكالىق بايلانىستاردىڭ وزەكتى ماسەلەلەرىن تالقىلادىق. ولار ەكى ەل اراسىنداعى شەكارا جانە كولىك تاسىمالىنا، فيتوسانيتارلىق، ۆەتەرينارلىق باقىلاۋعا قاتىستى بولدى.
سونداي-اق، ەاەو نورمالارىنا سايكەس كەدەن جانە سالىقتىق رەتتەۋ ماسەلەسى بويىنشا پروبلەمالىق ماسەلەلەر قارالدى. مىسالى، ءبىزدىڭ كەدەن ورگاندارى قىتايدان قازاقستان اۋماعى ارقىلى تاۋار الىپ ءوتۋ بارىسىندا قىرعىز كاسىپكەرلەرىنىڭ جالعان دەكلاراسيا بەرۋ فاكتىلەرىن انىقتاپ وتىر. بۇدان ءبىز كوپتەگەن شىعىن شەگۋدەمىز.
قىرعىز تارابى قويىلىپ وتىرعان ماسەلەلەرمەن كەلىستى. قىرعىز پرەمەر-مينيسترى قىرعىزستان تاراپىنان مىندەتتەمەلەردىڭ بارلىعىن بۇلجىتپاي ورىنداۋعا، سونداي-اق ەۋرازيالىق ەكونوميكالىق وداقتىڭ ەكونوميكالىق مۇددەلەرىن قورعاۋعا بايلانىستى ماسەلەلەردىڭ ۇيلەسىمدى شەشىمدەرىن تابۋعا كەپىلدىك بەردى.
ەكىنشىدەن، كەلىسسوزدەردىڭ قورىتىندىسى بويىنشا ەكى ەل پرەمەر-مينيسترلەرىنىڭ ءبىرىنشى ورىنباسارلارىنىڭ توراعالىعىمەن جۇمىس توبىن قۇرۋ تۋرالى شەشىم قابىلداندى. جۇمىس توبى الداعى 5 جۇمىس كۇنى ىشىندە بىرلەسكەن جول كارتاسىن دايىنداۋى ءتيىس.
جول كارتاسى قابىلدانعان سوڭ تاراپتار كەلىسىمدەردىڭ تولىق ورىندالۋىن قامتاماسىز ەتۋگە مىندەتتەمە الادى.
سونداي-اق، ءبىز وسى جىلعى 19-شى قازاندا ساعات 00:00-دەن باستاپ ەكى ەلدىڭ مەملەكەتتىك شەكاراسىن، اسىرەسە، قورداي بەكەتىندە، كەسىپ ءوتۋدىڭ باسىم ءتارتىبىن قامتاماسىز ەتەتىن بولىپ كەلىستىك.
كەلىسىم بويىنشا قول جۇكتەرىمەن وتەتىن جەكە تۇلعالار، جولاۋشىلار تاسىمالدايتىن اۆتوكولىكتەر، جەڭىل اۆتوكولىكتەر جانە بوس جۇك كولىكتەرى ءۇشىن مەملەكەتتىك شەكارانى كەسىپ ءوتۋدىڭ باسىم ءتارتىبى قابىلدانادى.
