21-22 قازان كۇندەرى الماتى قالاسى  ءال-فارابي اتىنداعى قازۇۋ-دىڭ سپورت كەشەنىندە «ەر جانىبەك» حالىقارالىق قوعامدىق قورىنىڭ ۇيىمداستىرۋىمەن شاعىن فۋتبولدان ءداستۇرلى «ER JANIBEK CUP-2017» حالىقارالىق ءتۋرنيرى وتەدى، دەپ Qamshy.kz اقپارات اگەنتتىگى حابارلايدى.

بيىلعى كۋبوك بەلگىلى عالىم، فيلولوگيا عىلىمدارىنىڭ دوكتورى، پروفەسسور تۇرسىنبەك كاكىشيەۆتىڭ 90 جىلدىق مەرەيتويىنا جانە الاشوردا قوزعالىسىنىڭ 100 جىلدىعىنا ارنالىپ وتىر.           

شاعىن فۋتبولدان وتەتىن حالىقارالىق ءتۋرنيردىڭ ماقساتى –  قازاق ادەبيەتى عىلىمىنا ولشەۋسىز ۇلەس قوسقان زەردەلى عالىم، قازاق ادەبيەتى سىنىنىڭ كورنەكتى وكىلى، فيلولوگيا عىلىمدارىنىڭ دوكتورى، پروفەسسور تۇرسىنبەك كاكىشيەۆتىڭ ەڭبەگى مەن ونەگەلى ءومىرىن جاستارعا ۇلگى ەتۋ. سونداي-اق، شەتەلدە تۇراتىن قازاق جاستارىنا تاۋەلسىز قازاق ەلىنىڭ  تىنىس-تىرشىلىگىن تانىستىرۋ، سپورتتىق ويىن ارقىلى اتاجۇرتىمەن مادەني-رۋحاني بايلانىسىن نىعايتۋدى ماقسات ەتەدى.

«ەر جانىبەك» حالىقارالىق قوعامدىق قورىنىڭ «ER JANIBEK CUP» ءتۋرنيرى  – بيىل ءىىى رەت وتكىزىلگەلى وتىر. 24 كوماندا ب ا ق سىنايتىن جارىستىڭ جۇلدە قورى 2 ميلليون تەڭگە. دۇنيەجۇزى قازاق جاستارىن شاقىرعان فۋتبول تۋرنيرىنە فرانسيا، تۇركيا، جۇڭگو، رەسەي (ومبى، ساراتوۆ قالالارىنان)، موڭعوليا، يران، وزبەكستان جانە قىرعىزستاندا تۇراتىن قازاق جاستارىنان قۇرالعان فۋتبول كوماندالارى قاتىسادى. سونىمەن قاتار، الماتى مەن استانا قالالارىنان جانە ەلىمىزدىڭ ءار وبلىسىنان كەلەتىن سپورتشىلار ويىن كورسەتەدى.

تۋرنيرگە دۇنيەجۇزى قازاقتارى قاۋىمداستىعى، ق ر مادەنيەت جانە سپورت مينيسترلىگى، الماتى قالاسىنىڭ اكىمشىلىگى، ءال-فارابي اتىنداعى قازاق ۇلتتىق ۋنيۆەرسيتەتى قولداۋ كورسەتىپ وتىر. تۋرنير كەزىندە شاعىن ەتنواۋىل تىگىلىپ، قولونەر كورمەسى وتەتىنىن دە حابارلايمىز!