نۇرسۇلتان نازاربايەۆ ساۋد ارابياسى كورولدىگىنىڭ ىشكى ىستەر ءمينيسترى ابدەل ءازيز بەن ساۋد بەن نايفپەن كەزدەستى، دەپ جازادى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ.
مەملەكەت باسشىسى قازاقستان مەن ساۋد ارابياسى كورولدىگى اراسىندا ورنىققان مەملەكەتارالىق ىنتىماقتاستىقتىڭ ماڭىزدىلىعى ەرەكشە ەكەنىن اتاپ ءوتتى.
– بيىل ءبىز تاۋەلسىزدىگىمىزدىڭ 26 جىلدىعىن اتاپ وتۋدەمىز. وسى كەزەڭ ىشىندە ساۋد ارابياسىمەن باۋىرلاستىق قارىم-قاتىناستار ورناتۋ ءۇشىن بارلىق شارالاردى اتقارىپ كەلەمىز. ەلوردامىز استانانى سالۋعا قولداۋ كورسەتكەندەرىڭىز ءۇشىن سىزدەرگە ريزاشىلىق بىلدىرەمىز، – دەدى قازاقستان پرەزيدەنتى.
سونىمەن قاتار، نۇرسۇلتان نازاربايەۆ جاھاندىق تەرروريزم مەن ەكسترەميزم ءقاۋىپ ءتوندىرىپ تۇرعان كەزدە ەكى ەلدىڭ قۇقىق قورعاۋ ورگاندارى اراسىندا بايلانىستار ورناتۋدىڭ ماڭىزدى ەكەنىن اتاپ ءوتتى.
ساۋد ارابياسى كورولدىگىنىڭ ىشكى ىستەر ءمينيسترى مەملەكەت باسشىسىنا ساۋد ارابياسىنىڭ كورولى سالمان بەن ابدەل ءازيز ءال ساۋدتىڭ سالەمىن جەتكىزىپ، ەلدەرىنىڭ ەكىجاقتى تابىستى ىنتىماقتاستىقتى ودان ءارى نىعايتۋعا جانە دامىتۋعا نيەتتى ەكەنىن ايتتى.
