اقش-تا 40-تان استام كونگرەسسمەن روحيندجا مۇسىلماندارىنا كورسەتكەن قىسىمدارى ءۇشىن ميانماعا سانكسيالار سالۋدى ۇسىندى، دەپ جازادى Qamshy.kz اقپارات اگەنتتىگى.
«ءبىز بيرما اۋماعىندا قامالعان نەمەسە ەلىنە قايتپاق نيەتتەگى ادامداردىڭ قاۋىپسىزدىگى ءۇشىن قولىمىزدان كەلگەنىنىڭ ءبارىن جاسايمىز»، - دەپ كەلتىردى رەيتەر اگەنتتىگى اقش بيلىگىنىڭ حابارلاماسىن.
بۇعان دەيىن اقش ميانمانىڭ اسكەري بيلىگىنە قارسى سانكسيالار قولدانعان ەدى. كەيىن بۇل ەلدىڭ دەموكراتيا جولىنداعى قادامدارىن بايقاعان رەسمي ۆاشينگتون قۇجاتتىڭ كۇشىن جويعان بولاتىن. ەندى كونگرەسسمەندەر سول قۇجاتتاردى قايتا كۇشىنە ەنگىزۋدى تالاپ ەتىپ وتىر. كوشى-قون جونىندەگى حالىقارالىق ۇيىمنىڭ دەرەگى بويىنشا، بانگلادەشكە تامىزدىڭ سوڭىنان باستاپ ميانمادان 500 مىڭنان استام بوسقىن باس ساۋعالاپ كەلگەن.
روحيندجا حالقى تۇرىپ جاتقان ايماقتاعى جاعداي بۇلىڭعىر. ويتكەنى ول جەرلەرگە بۇقارالىق اقپارات قۇرالدارى مەن حالىقارالىق ۇيىم وكىلدەرىنە كىرۋگە جول جوق. قۇقىق قورعاۋشىلار روحيندجالىقتاردىڭ ولىمىنە ميانما بيلىگى كىنالى دەپ ايىپتاسا، ميانمالىق ۇكىمەت، كەرىسىنشە، گۋمانيتارلىق كومەك كورسەتىلىپ جاتىر دەپ اعىنان جارىلدى.
