ەكسپو-قالاشىقتىڭ تۇرعىن ۇيلەرى مەن اۆتوتۇراقتارى ساتۋ ءۇشىن 2018 جىلدىڭ 1 قاڭتارىنان كەيىن عانا «بايتەرەك ديەۆەلوپمەنت» اق-قا قايتارىلادى، دەپ جازادى Qamshy.kz اقپارات اگەنتتىگى.

اعىمداعى جىلدىڭ جەلتوقسانىنا دەيىن «بايتەرەك ديەۆەلوپمەنت» اق «استانا ەكسپو-2017» ۇلتتىق كومپانياسىنان جالعا الۋشى رەتىندە قالا بەرمەك. سوندىقتان دا ونداعى پاتەرلەر بيىل ساتىلمايدى. ەكسپو-قالاشىق قازاقستان ۇكىمەتىنىڭ قاۋلىسىمەن 2014 جىلى «استانا ەكسپو-2017» ۇلتتىق كومپانياسىنىڭ يەلىگىنە بەرىلگەن.

جوبا اياقتالعان سوڭ وسى قۇجاتقا سايكەس جىلجىمايتىن مۇلىكتى ساتۋ ءۇشىن قالاشىق اكسيونەرلىك قوعامعا قايتارىلۋى ءتيىس بولاتىن. «ەكسپو-2017» حالىقارالىق كورمەسىنە ارناپ سالىنعان باسقا نىساندار، سونىڭ ىشىندە «نۇر الەم» پاۆيلونى مۋزەي كەشەنى رەتىندە پايدالانىلا بەرەدى.

س3 جانە س4 حالىقارالىق پاۆيلوندارىنا استانا حالىقارالىق قارجى ورتالىعى ورنالاسادى، س1 - «Job World» ادام رەسۋرستارىن دامىتۋ ءبىلىم بەرۋ ورتالىعى، D1 - «جاسىل» تەحنولوگيالار حالىقارالىق ورتالىعى، D4 - حالىقارالىق IT-تەحنوپارك ەنشىسىنە بەرىلەدى.

«كورمە اۋماعىنا ورنالاسقان (كوممەرسيالىق نەگىزدە - رەد.) ۇيىمدار تۋرالى اقپارات پاۆيلوندار جوندەلىپ، عيماراتتار جالعا بەرىلگەننەن كەيىن بەلگىلى بولادى»، - دەلىنگەن «استانا ەكسپو-2017» ۇلتتىق كومپانياسىنىڭ قازاقپارات ءتىلشىسىنىڭ رەسمي ساۋالىنا بەرگەن جاۋابىندا.