قوستانايداعى نازاربايەۆ زياتكەرلىك مەكتەبىنىڭ وقۋشىلارى الەۋمەتتىك ماڭىزى زور بىرنەشە جوبا ويلاپ تاپتى. جاس عالىمداردىڭ جاڭالىعى كەمتار جانداردىڭ مۇمكىندىگىن كەڭەيتۋگە باعىتتالىپ وتىر.
وقۋشىلار وزدەرى قۇراستىرعان «اقىلدى كيىمدەردىڭ» بولاشاقتا سۇرانىسقا يە بولارىنا سەنىمدى. ابىلايحان ادىلبەك پەن راۋحات ارقۇلوۆ «اقىلدى كيىم» جوباسىن 9-سىنىپ وقىپ جۇرگەندە قولعا الدى. كوز مايىن تاۋىسقان 4 جىلعى ەڭبەك ءوز جەمىسىن بەردى. اۋەلدەگى «اقىلدى قولعاپ»، ەندى تاقيامەن تولىقتى. شەكەسىنە قوندىرعى ورناتىلعان باسكيىم زاعيپ جاندارعا ارنالعان.
ابىلايحان ادىلبەك، نازاربايەۆ زياتكەرلىك مەكتەبىنىڭ 12-سىنىپ وقۋشىسى:
«بەلگىلى ءبىر نىسان وسى تاقيانىڭ ۋلتراجابدىعىنا جاقىنداعان كەزدە ول ءوز يەسىنە اقپارات بەرەدى. وسى دىبىس ارقىلى يەسى اقپاراتتى قابىلداپ، الدىندا ءبىر نارسە تۇرعانى جايلى جانە ونىڭ قوزعالىسىن باسقا بۇرۋ كەرەك ەكەنىن ويلاپ وتىرادى».
وقۋشىلاردىڭ باستى ارمانى – مۇگەدەكتەردىڭ مۇمكىندىگىن كەڭەيتۋ. مىلقاۋلار مەن ساڭىراۋلارعا ارنالعان قولعاپ تا وسى ماقساتتا ومىرگە كەلگەن. مۇندا قولدانۋشى ءوز ويىن شاعىن ەكران ارقىلى بىلدىرە الادى.
راۋحات ارقۇلوۆ، نازاربايەۆ زياتكەرلىك مەكتەبىنىڭ 12-سىنىپ وقۋشىسى:
«قولعاپتىڭ بارماقتاردىڭ بىر-بىرىنە ءتيۋى ارقىلى ءبىز بەلگىلى ءبىر ارىپتەردى جازا الامىز. ياعني تولىعىمەن الپىس ءارىپ جازۋعا بولادى. بۇل قازاقشا دا، ورىسشا دا، اعىلشىنشا دا الىپبيگە جەتەدى».
جاس عالىمدار جاڭالىعىن قوستانايداعى زاعيپتار قوعامىنا اپارىپ تانىستىردى. جانارى سۋالعان جاندار وقۋشىلار جاساعان «اقىلدى تاقيانى» كيىپ، تەكسەرىپ تە كوردى.
قىلىشباي بەكماعانبەتوۆتىڭ سۋ قاراڭعى بولعانىنا – 12 جىل. العاشقى دانا تاقيا وعان سىيعا بەرىلدى.
قىلىشباي بەكماعانبەتوۆ، ءى توپتاعى مۇگەدەك:
«بۇل بىزگە وتە قاجەت قۇرىلعى ەكەن. ءۇش جارىم مەتر قاشىقتىقتان ەسكەرتىپ، دىبىس بەرەدى. جالعىز جۇرگەندە كومەكشى. بولاشاقتا داۋىستايتىن قىلىپ جەتىلدىرسە، تىپتەن تاماشا بولار ەدى».
«اقىلدى تاقيا» ارزاندىعىمەن دە ەرەكشەلەنەدى. قوندىرعى ورناتىلعان باسكيىمنىڭ قۇنى مىڭ جارىم تەڭگە شاماسىندا. قوستاناي وبلىستىق زاعيپتار قوعامىندا 700-دەن استام مۇشە بار ەكەنىن ەسكەرسەك، كەلەشەكتە ونىڭ سۇرانىسقا يە بولارى انىق. وقۋشىلار ەڭبەكتەرىن جەتىلدىرۋ ۇستىندە.
