«قازاقستاندى ۇلى ەل دەپ سانامايتىنىن، ءبىراق پرەزيدەنت نۇرسۇلتان نازاربايەۆتى ۇلى ادام دەپ تانيتىن، قازاقستاننىڭ رەسەيمەن بىرىگۋىن سۇراعان» ەرمەك تايشىبەكوۆ مەرزىمىنەن بۇرىن بوستاندىققا شىقتى.
بۇل تۋرالى بلوگەر رينات كيبرايەۆ ۆيدەو سۇحباتى ارقىلى حابارلادى.
اتالمىش جاڭالىقتى رەسەيلىك ب ا ق «جاقسى جاڭالىق»، «قازاقستانداعى ورىس فوبياسىنا قارسى كۇرەسكەر بوستاندىققا شىقتى» دەگەن تاقىرىپپەن اتويلاپ جاپپاي جازىپ جاتىر. ولار ءۇشىن جاقسى جاڭالىق بولماي ءقايتسىن. سەبەبى ەرمەك تايشىبەكوۆ قازاقستان مەن رەسەيدىڭ بىرىگۋىن قولداعانداردىڭ ءبىرى دە بىرەگەيى.
ەرمەك تايشىبەكوۆ الەۋمەتتىك جەلىدە قازاقستان مەن رەسەي بىرىكسە نۇرسۇلتان نازاربايەۆ «بىرلەسكەن مەملەكەتتىڭ» پرەزيدەنتى، ال رەسەي پرەزيدەنتى ۆلاديمير پۋتين – ارنايى قىزمەت باسشىسى بولعانى ءجون» دەپ جازعان.
قازاق جىگىتىنىڭ اتا-بابالارىمىزدىڭ قانىمەن، جانىمەن كەلگەن تاۋەلسىزدىك، ءاربىر قازاققا امانات ەتىپ بەرىلگەن قازاقستان اتتى كەڭ بايتاق جەردى رەسەيگە بەرۋدى سۇراعان قازاق جىگىتىنىڭ مۇنداي قادامىن قاتاڭ سىنعا العانداردىڭ قاراسى كوپ بولعانى بەسەنەدەن بەلگىلى.
اتالمىش ويلارىمەن قازاق حالقىنىڭ قىتىعىنا ءتيىپ، اشۋىن كەلتىرگەن ەرمەك تايشىبەكوۆ ۇلتارالىق ارازدىق تۋدىردى دەگەن ايىپپەن سوتتالعان. جامبىل وبلىسى قورداي اۋداندىق سوتى ونى 4 جىلعا باس بوستاندىعىنان ايىرىپ، جازاسىن جالپى تارتىپتەگى تۇرمەدە وتەۋگە ۇكىم ەتكەن.
ەرمەك تويشىبەكوۆ ونىڭ ەكى جىلىن وتىردا دا، شارتتى تۇردە مەرزىمىنەن بۇرىن بوستاندىققا شىقتى.
رەسەيگە بىرىگۋدى سۇراعان، ۇلتارازدىقتى قوزدىرعان ادام ەكى جىل عانا تۇرمەدە وتىرىپ بوستاندىققا شىقسا، نەلىكتەن ماكس بوقايەۆ، تالعانت ايان، ارون اتابەك، سەيتقازى ماتايەۆتاردىڭ ءالى كۇنگە دەيىن تەمىر توردىڭ ارعى جاعىندا وتىرعانى تۇسىنىكسىز.
وتانىن ۇلى ەل دەپ سانامايتىن جانە تاۋەلسىز قازاقستاندى وزگەنىڭ بوداندىعىنا بەرۋگە ءازىر ادامنىڭ بوستاندىقتا، بابالارىمىزدىڭ نايزانىڭ ۇشىمەن، بىلەكتىڭ كۇشىمەن كوزىنىڭ قاراشىعىنداي قورعاپ، كەلەر ۇرپاققا، بىزگە امانات ەتىپ جەتكىزگەن جەرىندە ەمىن-ەركىن ءجۇرىپ، اۋاسىن تىنىستاپ جۇرگەندە، نەلىكتەن قازاقستاننىڭ جەرى جالعا بەرىلمەۋى ءۇشىن كۇرەسكەن ازاماتتار قاپاستا وتىرۋى كەرەك؟!
كىندىك قانى تامعان جەرىن، بۇلكىل بولمىسى، تاريحى، مادەنيەتى، ادەبيەتى، ءدىلى، ءدىنى سىڭگەن وتانىن ۇلى دەپ سانامايتىن ادامنىڭ قازاقستانعا زيانىن تيگىزبەسە، پايدا اكەلمەيتىنى حاق.
ەرمەك تايشىبەكوۆ بوستاندىققا شىققاننان كەيىن بلوگەر رينات كيبرايەۆ ودان سۇحبات الىپ، ونى جەلىگە جاريالادى.
رينات كيبراۆەتىڭ ءوزى دە وتكەن جىلى "جەزوكشەلiكپەن اينالىسۋعا ارنالعان پريتوندار ۇيىمداستىرۋ نەمەسە ولاردى ۇستاۋ جانە سۋتەنەر بولۋ" ايىبىمەن سوتتالعان. ول ءبىر جارىم جىل باس بوستاندىعىنان ايىرۋ جازاسىنىڭ ۇشتەن ءبىرىن وتەپ، جازانىڭ قالعان بولىگىن ايىپپۇل تولەۋمەن اۋىستىرۋ تۋرالى سوت شەشىمى كۇشىنە ەنگەن.
