الماتى قالاسىندا مەدەۋ اۋدانىندا قالالىق سەنبىلىكتە اۋدان اكىمى مەن بىرنەشە بەلگىلى تۇلعالارمەن اعاش وتىرعىزدى، دەپ حابارلايدى Qamshy.kz اقپارات اگەنتتىگى.

بۇگىن الماتىدا قالا بويىنشا ءوتىپ جاتقان سەنبىلىكتە بارلىق اۋدان اكىمدىكتەر ۇجىمى مەن كوپتەگەن ۇيىمدار، جەكە كاسىپورىندار قالانى تازارتۋ ماقساتىندا سەنبىلىككە شىعۋدا. وسىعان وراي مەدەۋ اۋدانى اكىمدىگى قالانىڭ جوعارعى جاعىندا اعاش وتىرعىزۋ جۇمىستارىن ۇيىمداستىرىپ، وعان بىرنەشە بەلگىلى تۇلعالار، ەرىكتىلەر، سونىمەن قاتار ب ا ق وكىلدەرى جۇمىلا اتسالىستى.

بۇگىنگى اعاش وتىرعىزۋ جۇمىستارىن ءبىراۋىزدان كەلىسىپ، اتسالىسقان تۇلعالاردى مەدەۋ اۋدانى اكىمى ەرجان جۇمات ۇلى جىلقىبايەۆ ءوزى باستاپ كەلدى. اتالمىش شاراعا، سونىمەن قاتار، عابيت مۇسىرەپوۆ اتىنداعى جاستار تەاترىنىڭ باسشىسى ءسابيت ءابدىحالىقوۆ، اتالمىش تەاتر ونەرپازى، اكتەر جومارت زەينابىل، ەلىمىزگە بەلگىلى جۇرگىزۋشى ايدىن شالقار انە وزگە دە تۇلعالار قاتىستى.

مەدەۋ اۋدانى اكىمى ەرجان جۇمات ۇلى مۇنداي جۇمىستاردىڭ قار تۇسكەنشە ءالى جالعاسىن تاباتىندىعىن ايتىپ ءوتتى.

«بۇگىن قالا بويىنشا سەنبىلىك ءوتىپ جاتىر. ءبىزدىڭ اۋدان بويىنشا بۇگىنگى سەنبىلىككە 15 مىڭعا جۋىق ادام شىقتى. ونىڭ ىشىندە اۋدانداعى بارلىق مەملەكەت قىزمەتكەرلەرى، اۋدان حالقىنىڭ كوپشىلىگى جانە دە ستۋدەنتتەر قاتىسىپ، جۇزدەن استام تەحنيكا جۇمىلدىرىلدى.

ءبىز تەك قانا سەنبىلىك جاساپ قويماي، اعاش وتىرعىزۋ جۇمىستارىمەن دە اينالىسىپ جاتىرمىز. بۇگىن 50 ءتۇپ اعاش ەكتىك.

بەكەمباي وزەنى جاعالاۋىنداعى ساياباقتى بيىل بيۋدجەتتەن قارجى ءبولىپ، جوندەۋ جۇمىستارىن جاسادىق. ايتا كەتەر بولساق، بەكەمباي وزەنىنىڭ اينالاسىنىڭ بارلىعى بىلتىر سۋ قاتتى كوتەرىلىپ، سونىڭ سالدارىنان جۇرگىنشىلەر جولى شايىلىپ، ونى جاۋىپ تاستاعان بولاتىن. بيىلعى جىلى سونى قولعا الىپ، قاجەتتى قاراجاتتى ءبولىپ، جوندەۋدەن وتكىزدىك. بۇگىندە وزەن جاعاسىندا اعاش وتىرعىزىپ، قالانى كوگالداندىرۋعا بارىنشا اتسالىسىپ جاتىرمىز.

بۇدان بولەك بۇگىن اۋدانىمىزداعى بارلىق ساياباقتا، جالپى اۋدان بويىنشا سەنبىلىك ءوتىپ، اعاش وتىرعىزىلىپ جاتىر. اۋدان حالقى بەلسەندىلىك تانىتىپ، اركىم شاماسى كەلگەنشە بارىنشا اتسالىسىپ جاتىر»، - دەيدى اۋدان اكىمى.

سونىمەن قاتار، ەرجان جۇمات ۇلى بيىلعى جىلى بيۋدجەتتەن 1،8 ميلليارد تەڭگە ءبولىپ، 120 اۋلانى كۇردەلى جوندەۋدەن وتكىزگەندىگى جايىندا دا ايتىپ ءوتتى.

«بيىل جوندەۋدەن وتكەن اۋلالارداعى جۇمىستار بىتۋگە تاياپ قالدى. قالا تازالىعى ءۇشىن بۇل ىسكە حالىقتى دا جۇمىلدىرىپ جاتىرمىز. بۇگىن، مىنە، مەن ارالاپ كەلدىم، 120 اۋلانىڭ بارلىعىندا دا سەنبىلىك ءوتىپ جاتىر. اعاشتاردى اقتاۋ، قوقىستاردان، جاپىراقتاردان تازارتۋ، اعاش وتىرعىزۋ جۇمىستارى قارقىندى تۇردە جۇرۋدە.

ايتا كەتەيىك، بۇل دەگەنىمىز تەك ءبىر رەت قانا جاسالاتىن اكسيا ەمەس، اۋدانىمىزدا اپتا سايىن سەنبىلىك جاسالىنادى. مۇنىڭ باستى سەبەبى – ءبىز قىس مەزگىلىنە دەيىن، قار تۇسكەنشە بۇكىل وزەن، كولدەردى، ساياباقتاردى، اۋلالاردى قوقىستاردان، جاپىراقتاردان تازارتىپ الۋىمىز قاجەت»، - دەپ ءتۇيدى ەرجان جۇمات ۇلى.