Amnesty International حالىقارالىق زاڭ ۇيىمى ميانمانىڭ راكحاين شتاتىندا اسكەريلەردىڭ ادامزاتقا قارسى قىلمىس جاساعانىنا سەنىمدى دالەلدەر بار ەكەنىن مالىمدەدى، — دەپ حابارلايدى Qamshy.kz اقپارات اگەنتتىگى kazislam.kz سايتىنا سىلتەمە جاساي وتىرىپ.

ۇيىمنىڭ جاڭا ەسەبىنە سايكەس، ميانمادا جاپپاي زورلىق-زومبىلىق، قاستاندىق، زورلاۋ، قىسىم كورسەتۋ جانە مۇسىلمانداردى اسكەريلەردىڭ كۇشىمەن قۋىپ شىعۋ فاكتىلەرىنە قاتىستى كوپتەگەن دەرەكتەر بار. Amnesty International ۇيىمى بۇۇ قاۋىپسىزدىك كەڭەسىنەن ميانماعا قارۋ كىرگىزۋگە تىيىم سالۋعا جانە ازيالىق مەملەكەتتىڭ جوعارى شەندى تۇلعالارىنا سانكسيا جاريالاۋعا شاقىردى.

ۇيىم مالىمەتىندە ميانمادا جۇزدەگەن ەر، ايەل ادامدار مەن روحينيالىق بالالار جاپپاي جانە جۇيەلى قىرىپ-جويۋ قۇربانىنا اينالعانى اتاپ كورسەتىلگەن. بۇل ەسەپ 150 كۋاگەردىڭ، سپۋتنيكتىك دەرەكتەردىڭ، فوتو-بەينەماتەريالداردىڭ نەگىزىندە جيناقتالعان.

Amnesty International ۇيىمىنىڭ ميانما بويىنشا زەرتتەۋشى مامانى لاۋرا حايدىڭ ايتۋىنشا، ەلدەگى روحينيالىقتارعا قارسى قىلمىس ميانمادا تۇراتىن كاچين، شان جانە پالاۋنگ سەكىلدى ەتنيكالىز ازشىلىق قاۋىمدارعا جاسالاتىن قاستاندىقتارعا ۇقساس. ول ميانما اسكەريلەرى زاڭسىز ارەكەتتەرگە بارىپ وتىرعانىن، سونداي-اق ەشكىمنىڭ الدىندا ەسەپ بەرمەيتىندەرىن اتاپ كورسەتتى.