بۇگىن تۇران ۋنيۆەرسيتەتىندە الماتى قالاسىنىڭ قوعامدىق كەڭەسى ءوتتى دەپ حابارلايدى Qamshy.kz اقپارات اگەنتتىگى.

الماتى قالاسىنىڭ قوعامدىق كەڭەسىندە مەكتەپتەگى قاۋىپسىزدىك  ماسەلەسى قوزعالىپ، وقۋشىلار مەن ستۋدەنتى اجالدان اراشالاپ قالاتىن قۇرىلعىنى تانىستىردى.

الماتى قالاسىنىڭ قوعامدىق كەڭەسىنىڭ مەملەكەتتىك جەكە ارىپتەستىك جانە تۇرعىن ءۇي كوممۋنالدىق قىزمەت، يننوۆاسيا، ينۆەستيسيا، بويىنشا كوميسسيانىڭ تورەعاسى، مودەراتور اسىلبەكوۆ اسحات زەينوللا ۇلى قوعامدىق كەڭەستى اشىپ بەردى. 

"اق جۇرەك" قوعامدىق قورىنىڭ ءتوراعاسى ماسحۋتوۆ رۋسلان بايان ۇلى قوعامدىق كەڭەستە ءبىرىنشى كومەكتى قالاي كورسەتۋ كەرەكتىگى تۋرالى ايتىپ، قازىرگى كەزدە كەرەك دەفيبريللياتور قۇرىلعىسى تۋرالى ءتۇسىندىردى.

«دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنە سۇيەنسەك، اپتا سايىن 1 ملن ادامعا شاققاندا ورتا ەسەپپەن 30 ادامنىڭ جۇرەگى اياقاستى توقتاپ قالادى. ەگەر قازاقستاندا 17 ملن تۇرعىن بار دەپ ەسەپتەسەك، وندا اپتا سايىن ەلىمىزدە 500 ادامنىڭ جۇرەگى كۇتپەگەن جەردەن توقتاپ، قايعىلى جاعدايعا ۇشىراپ جاتادى. ال جىل سايىن، ەلىمىزدە 26 مىڭ ادام جۇرەك تالماسى بويىنشا مەديسينالىق كومەككە مۇقتاج. وسى 26 مىڭ وقيعانىڭ 80 پايىزىندا ادامدار مەديسينالىق عيماراتتان تىس جەردە، ياعني جۇمىستا، سپورتپەن شۇعىلدانىپ جاتقانىندا، ۇيدە نەمەسە كەز كەلگەن جەردە قايعىلى جاعدايعا دۋشار بولادى. بۇل مەديسينالىق ەمەس، الەۋمەتتىك پروبلەماعا اينالدى»، - دەگەن رۋسلان ماسحۋتوۆ قازاقستاندا مەكتەپ وقۋشىلارىنىڭ دا جۇرەك تالماسىنا شالدىعىپ جاتاتىنىن ايتتى.

«بىلتىرعى وقۋ جىلىندا استانا قالاسىنداعى 84 مەكتەپ بويىنشا 2 وقيعا تىركەلدى. 1 وقۋشى دەنە شىنىقتىرۋدا قازا تاپسا، ەكىنشى وقۋشىنىڭ كەۋدە تۇسىنان ۇرعاندىقتان مەرت بولدى. قازاقستاندا ناقتى ستاتيستيكانى كەلتىرۋ مۇمكىن ەمەس. سەبەبى، بۇل ماسەلە ب ا ق ارقىلى ءجيى ايتىلمايدى. شامامەن، 10-15 وقۋشى قازاقستان بويىنشا جۇرەك تالماسىنا ۇشىراپ جاتادى. ناقتى ستاتيستيكا كەلتىرە المايتىن تاعى سەبەپ، جەدەل جاردەم كەلگەن ۋاقىتتا ناۋقاس دۇنيەدەن ءوتىپ كەتەدى. اياق استى جۇرەگى توقتاعان ادامعا العاشقى ەكى مينۋتتا كومەك كورسەتىلمەسە، ول قايتىس بولادى. سوندىقتان، بۇل ستاتيستيكا بىزدە ناقتى ەمەس»، - دەدى رۋسلان بايان ۇلى.

رۋسلان ماسحۋتوۆتىڭ ايتۋىنشا، وسىنداي سەبەپتەردىڭ الدىن الۋ ءۇشىن بارلىق مەكتەپتەرگە جۇرەك توقتاعان كەزدە كومەك كورسەتەتىن قۇرىلعى - دەفيبريللياتور الۋ قاجەت. 

«كەز كەلگەن جەردە ادام ەسىنەن تانىپ، قۇلاپ جۇرەگى توقتاپ قالسا، وعان ءارى كەتسە 5 مينۋت، ال نەگىزى 2 مينۋتتىڭ ىشىندە كومەك كورسەتىلسە، ءتىرى قالاۋى مۇمكىندىگى بار.  وسى جاعدايدا امەريكالىق ءونىم - دەفيبريللياتور قۇرىلعىسى كومەك كورسەتەدى. بۇعان دەيىن ەلىمىزدە بۇل زاماناۋي تەحنولوگيانى الماتى مەن استانانىڭ ەڭ ۇزدىك ەمحانالارى قولدانىپ كەلگەن» - دەدى ماسحۋتوۆ رۋسلان بايان ۇلى.

الداعى ۋاقىتتا  ماماندار دەفيبريللياتوردى الماتىنىڭ بارلىق مەكتەپتەرىنە ساتىپ الۋ قاجەت دەگەن ۇسىنىستارىن قالالىق اكىمدىككە جەتكىزبەك.