ينتەرپول جەلىسى بويىنشا قازاقستاندىق جۋرناليست جانار احمەت حالىقارالىق ىزدەۋدە ءجۇر، دەپ Qamshy.kz اقپارات اگەنتتىگى korrespondent.net سايتىنا سىلتەمە جاساپ حابارلايدى. 

جانار احمەتتىڭ قورعاۋشىسى ونىڭ  ۆىشگورود قالاسىنىڭ ۋاقىتشا ۇستاۋ اباقتىسىندا وتىرعانىن مالىمدەگەن بولاتىن. ءجۋرناليستتىڭ قورعاۋشىلارىنىڭ ءبىرى ۆلاديسلاۆ گريششەنكونىڭ حابارلاۋىنشا، ول كييەۆ-سۆياتوشينسك اۋدانىندا ۇستالىپ، سول ۋاقىتتا قۇزىرلى ورگاندار حاتتاما جاساعان. جانار احمەتتىڭ ۇستالۋىنىڭ سەبەبى: ينتەرپولدىڭ جەلىسى بويىنشا حالىقارالىق ىزدەستىرۋ تىزىمىندە بولعاندىعى جانە قازاقستاندا الاياقتىعى ءۇشىن ىزدەۋ جاريالانعانى ەكەن. ءقازىر جۋرناليست ۆىشگورود قالاسىنداعى ۋاقىتشا ۇستاۋ اباقتىسىندا.

23 قازاندا، ياعني بۇگىن  كييەۆ اۋدانىنىڭ كييەۆ-سۆياتوشينسك سوتى جانار احمەتتى «ەكستراديسيالاۋ ءراسىمى شەڭبەرىندە ۋاقىتشا قاماۋعا الۋ تۋرالى» ماسەلەنى قارايتىن بولادى. ايتا كەتۋ كەرەك، ۇستالعان ءجۋرناليستتىڭ كامەلەتتىك جاسقا تولماعان بالاسى بار. ول تانىستارىنىڭ قامقورلىعىندا. ويتكەنى، ولاردىڭ ۋكراينادا ەشقانداي تۋىستارى جوق.

كييەۆ وبلىسىنداعى ۇلتتىق پوليسيانىڭ وكىلى نيكولاي جۋكوۆيچ جانار احمەتتىڭ قالاي ۇستالعانىن جانە ونىڭ تۇرعىلىقتى جەرىن راستادى. «قىلمىستىق ءىس جۇرگىزۋ كودەكسىنىڭ 208-بابى («ۋاكىلەتتى لاۋازىمدى تۇلعانىڭ ۇستالۋى») بويىنشا ۇستالعان قازاقستاندىق جۋرناليست ۆىشگورود قالاسىنداعى  ۋاقىتشا ۇستاۋ اباقتىسىندا. ەرتەڭ نەمەسە ارعى كۇنى سوتقا شاقىرىلادى. ول ينتەرپول جەلىسى بويىنشا ىزدەۋدە بولعاندىعى ءۇشىن قامالدى»، - دەدى جۋكوۆيچ.

ەستەرىڭىزدە بولسا، جانار احمەت 2017 جىلدىڭ ناۋرىز ايىندا قازاقستاننان ۋكرايناعا قاشىپ كەتكەن بولاتىن.