باقىتجان ساعىنتايەۆ عيماراتتى ارالاۋ بارىسىندا تىركەۋ ءبولىمىنىڭ، كولل-ورتالىقتىڭ، جۇمىس كابينەتتەرىنىڭ جانە ەكۇ-زەرتحانالارىنىڭ جۇمىسىمەن تانىستى. ءوز كەزەگىندە ينستيتۋت ديرەكتورى تامارا جۇسىبالييەۆا پرەمەر-مينيستردى ورتالىقتىڭ قىزمەتى، الەۋمەتتىك جاۋاپكەرشىلىك اياسىندا مىندەتتەردىڭ ورىندالۋى، سونداي-اق، رەپرودۋكتيۆتى مەديسيناداعى جەتىستىكتەر مەن عىلىمي قىزمەت تۋرالى اقپاراتتاندىردى.

ايتا كەتۋ كەرەك، 2017 جىلى ەكۇ ورتالىعىندا جەرگىلىكتى اكىمدىك قاراجاتى ەسەبىنەن 300 الماتىلىق وتباسى ءتيىستى مەديسينالىق كومەك الدى جانە تاعى شامامەن 700 ادام كەزەكتە تۇر.

جاڭا كلينيكا حالىقارالىق تالاپتاردى ەسەپكە الا وتىرىپ تۇرعىزىلعان جانە زاماناۋي جابدىقتارمەن جاراقتاندىرىلعان. ونىڭ ەرەكشەلىگى تولىقتاي وقشاۋلاندىرىلعان وپەراسيالىق بلوگى مەن ەمبريولوگيالىق زەرتحاناسىنىڭ بولۋىندا. بۇل ميكروكليماتتى ساقتاۋعا جانە تۇراقتى تەمپەراتۋرا مەن ىلعالدىلىقتىڭ زارارسىزداندىرىلعان اۋامەن قامتاماسىز ەتىلۋىنە مۇمكىندىك بەرەدى. وسىنداي «تازا عيمارات» جۇيەسى جوعارعى كلينيكالىق ناتيجەلەر بەرىپ، ەمدەۋ تيىمدىلىگىن ايتارلىقتاي ارتتىرادى.

بۇدان وزگە، كلينيكا الماتىدا مەديسينالىق تۋريزم دامۋىنىڭ جارقىن مىسالى بولىپ تابىلادى. رمي ديرەكتورىنىڭ ايتۋىنشا، كورسەتىلەتىن مەديسينالىق قىزمەتتەر باعاسىنىڭ ارزان بولۋىنا قاراماستان، شەتەلدىك انالوگتارىنان كەم تۇسپەيدى. دارىگەرلەردىڭ جوعارى بىلىكتىلىگى، زاماناۋي جابدىقتار مەن قازاقستان زاڭدارىنىڭ بەيىلدىلىگى شەتەلدىكتەردىڭ كوپتەپ كەلۋىنە جول اشۋدا. ەكى جىلدىڭ ىشىندە الماتىعا تۇركيادان، قحر-دان، گەرمانيا، رەسەي جانە اقش-تان كەلگەن ەمدەلۋشىلەردىڭ سانى مەديسينالىق تۋريزم جەلىسى بويىنشا بىرنەشە ەسەگە ارتتى. جىل سايىن رمي كلينيكاسى 3 000-عا دەيىن وتباسىن قابىلداي الادى. 

سونىمەن قاتار، الماتى قالاسىنا جۇمىس ساپارى بارىسىندا ق ر پرەمەر-مينيسترى باقىتجان ساعىنتايەۆ يننوۆاسيالىق تەحنولوگيالار پاركىن ارالاپ، قازاقستاندىق عالىمداردىڭ عىلىمي ازىرلەمەلەرىمەن تانىستى.

«يتپ» اەا ارالاۋ بارىسىندا باقىتجان ساعىنتايەۆ وپەراتورلاردى، مۇناي ينجەنەرلەرىن، بۇرعىلاۋ مەردىگەرلەرىن جانە سەرۆيستىك كومپانيالاردىڭ تەحنيكالىق كادرلارىن كاسىپتىك دايارلاۋ بويىنشا زاماناۋي وقۋ-جاتتىعۋ ورتالىعىن، سونداي-اق زاماناۋي يمپورتتى الماستىراتىن تەلەكوممۋنيكاسيالىق جابدىقتار وندىرەتىن كومپانيانى ارالادى.     

«يننوۆاسيالىق تەحنولوگيالار پاركى» ارنايى ەكونوميكالىق ايماعى ق ر پرەزيدەنتىنىڭ جارلىعىنا سايكەس قۇرىلعان جانە اقپاراتتىق تەحنولوگيالار، ەلەكترونيكا جانە قۇرال جاساۋ، جاڭعىرتپالى ەنەرگيا كوزدەرى، رەسۋرستى ۇنەمدەۋ، ءتيىمدى تابيعات پايدالانۋ جانە ت.ب. سالالاردى دامىتۋمەن اينالىسادى.

«يتپ» اەا 2015 جىلى ۇكىمەتپەن بەكىتىلگەن «يننوۆاسيالىق تەحنولوگيالار پاركى» دەربەس كلاستەرلىك قورىنىڭ قۇرامىنا كىرەدى. ول Almaty Tech Garden قولشاتىر برەندىنىڭ استىنا الماتى قالاسىنىڭ جەتەكشى جوو مەن عزي-نىڭ عىلىمي-تەحنيكالىق بازاسىن، سونىمەن قاتار «يتپ» اەا-عا قاتىسۋشى كومپانيالاردى شوعىرلاندىرادى. قازىرگى تاڭدا يننوۆاسيالىق كلاستەرگە قاتىسۋشى 221 ۇيىم بار.