قىرعىزستان پرەمەر-مينيسترى ساپار يساكوۆ 25 قازاندا ەريەۆانداعى ەۋرازيا ۇكىمەتارالىق كەڭەسىنىڭ وتىرىسىندا قازاق-قىرعىز شەكاراسىنداعى جاعدايعا قاتىستى پىكىرىن ايتتى،-دەپ Qamshy.kz اقپارات اگەنتتىگى ازاتتىق سايتىنا سۇيەنە وتىرىپ جازادى. 

- ءبىز پرەمەر-مينيسترلەر دەڭگەيىندە بۇل ماسەلەنى شەشۋ ءۇشىن كەلىسسوز جۇرگىزىپ جاتىرمىز. ەكى ەل شەكاراسىنداعى كەيبىر كەدەرگىلەر جويىلدى. ول ءۇشىن قازاقستانعا العىس ايتامىز. ءبىراق بۇل ماسەلە تۋىنداماۋى كەرەك ەدى. سەبەبى ەكى ەل اراسىنداعى كەلىسىمگە ساي جۇك تيەگەن قىرعىز كولىكتەرى شەكارادا تۇرىپ قالماي كەدەرگىسىز ءوتۋى ءتيىس. ەۋرازيا ەكونوميكا وداعىنىڭ پرينسيپتەرى بويىنشا تاۋار، كاپيتال، قىزمەت پەن جۇمىس كۇشىنىڭ قوزعالىسىنا كەدەرگى بولماۋى كەرەك. قازاقستان تاراپى شەكاراداعى ماسەلەنى تولىق شەشەدى دەپ ۇمىتتەنەمىز،- دەدى يساكوۆ.

ەريەۆانداعى وتىرىستا قازاقستان پرەمەر-مينيسترى باقىتجان ساعىنتايەۆتىڭ ساپار يساكوۆپەن كەزدەسكەنى حابارلاندى.

10 قازاننان باستاپ ەكى ەل شەكاراسىندا تەكسەرۋ كۇشەيتىلىپ، قازاقستانعا وتەتىن ادامدار مەن كولىكتەر كەزەگى پايدا بولعان.

18 قازاندا استانادا ەكى ەل پرەمەر-مينيسترلەرى كەلىسسوزدەر وتكىزىپ، جولاۋشى كولىكتەرى مەن جۇگى بار ادامداردى شەكارادان وتكىزۋدى وڭايلاتۋ تۋرالى ۋاعدالاسقان. بۇل كەلىسسوزدەن كەيىن تەكسەرۋ بەكەتىندە كەزەك كۇتكەن ادامدار سانى ازايعان ەدى. ال 25 قازاندا قىرعىزستان شەكارا قىزمەتى "اق-تىلەك" شەكارا بەكەتىندە بەس جۇزگە جۋىق جۇك كولىگى تۇرعانىن حابارلادى.