الماتىدا "ۇزدىك مۇراعاتشى" ءىى رەسپۋبليكالىق بايقاۋى ءوتتى، دەپ حابارلايدى.

ارحيۆتە جۇمىس جاساۋ - ۇلكەن ىجداعاتتىلىق پەن ءبىلىمپازدىقتى تالاپ ەتەدى.

«بايقاۋ تەك ءبىلىم الاتىن الاڭ  ەمەس، جاس ورەندەرگە ءوز تالانتتارى مەن مۇمكىنشىلىكتەرىن جاريا ەتەتىن ورىنعا اينالدى. ەڭ العاش، 2015 جىلى ق ر پرەزيدەنتى ءارحيۆى ەلدەگى ۇزدىك مۇراعاتشىنى انىقتاۋ تۋرالى باستاما ۇسىندى. قازاقستاننىڭ ءار وڭىرىندەگى ۇيىمدار بۇعان قولداۋ ءبىلدىردى. بۇل بايقاۋ ەلدەگى ارحيۆيستەردىڭ مەرەيىن ارتتىرىپ، جاس مامانداردىڭ بىلىكتىلىگىن ارتتىرۋعا سەپتىگىن تيگىزەدى دەگەن سەنىمدەمىن»، - دەدى الماتى ورتالىق مەملەكەتتىك ءارحيۆىنىڭ ديرەكتورى ابزال بوتانوۆ.

سايىستا قازاقستاننىڭ تۇكپىر-تۇكپىرىنەن كەلگەن ماماندار ب ا ق سىنادى.

اتاپ ايتقاندا، ق ر پرەزيدەنتى ءارحيۆى، ق ر مادەنيەت جانە سپورت مينيسترلىگى ورتالىق مەملەكەتتىك ءارحيۆى، ق ر مادەنيەت جانە سپورت مينيسترلىگى ورتالىق مەملەكەتىك عىلىمي تەحنيكالىق قۇجاتتاما ءارحيۆى، الماتى قالاسى مەن اتىراۋ، شىعىس قازاقستان، جامبىل، وڭتۇستىك قازاقستان جانە سولتۇستىك قازاقستان وبلىستارىنىڭ مەملەكەتتىك ارحيۆتەرىنىڭ كوماندالارى ب ا ق سىنادى.

«قاتىسۋشىلار ەكى كەزەڭنەن ءوتتى. بىرىنشىسىندە ولاردىڭ ارحيۆ زاڭناماسى تۋرالى ءبىلىمى تەكسەرىلدى. ەكىنشى كەزەڭدە كوماندالاردىڭ ءبىلىمى جانە كاسىبي شەبەرلىگى سىنعا ءتۇستى»،- دەدى  ابزال بوتانوۆ.

ونىڭ ايتۋىنشا، مۇنداي بايقاۋ مەملەكەت باسشىسىنىڭ «بولاشاققا باعدار: رۋحاني جاڭعىرۋ» ماقالاسىندا كوتەرىلگەن ءبىرقاتار مىندەتتەردىڭ ورىندالۋىنا سەپتىگىن تيگىزەدى ءارى ەڭبەك رەسۋرستارىنىڭ ساپاسىنىڭ ارتۋىنا، جاس مامانداردىڭ ىسكەرلىك بەلسەندىلىگىن ارتتىرۋعا سەپ بولادى.

ەكى كۇنگە سوزىلعان سايىستا قىزىلوردا وبلىسىنىڭ جاس ارحيۆشىلەرى ءبىرىنشى ورىنعا لايىق دەپ تانىلدى.

ەكىنشى ورىندى سولتۇستىك قازاقستان وبلىستىق مادەنيەت، ارحيۆتەر جانە قۇجاتتاما باسقارماسىنىڭ جانە جامبىل وبلىستىق مادەنيەت باسقارماسىنىڭ  كوماندالارى ءبولىستى.

ءۇشىنشى ورىن جەزقازعان مەملەكەتتىك ءارحيۆىنىڭ قىزمەتكەرلەرىنە بۇيىردى.