بالقاش قالاسىندا بۇرىنعى سوتتالۋشىلارعا ارنالعان داعدارىس ورتالىعى اشىلدى. بۇل قاراعاندىدان كەيىنگى وسىنداي ورتالىقتى اشقان قازاقستانداعى ەكىنشى قالا،-دەپ Qamshy.kz اقپارات اگەنتتىگى «قازاقپارات» تىلشىسىنە سۇيەنە وتىرىپ جازادى. 

بالقاش داعدارىس ورتالىعى باس بوستاندىعىنان ايىرۋ ورىندارىنان بوساپ شىققان جانە پروباسيا ەسەبىندە تۇراتىن ازاماتتارعا قىزمەت كورسەتەدى. ورتالىق ولارعا الەۋمەتتىك قىزمەتتەردىڭ بارلىق تۇرلەرى جايىندا تولىققاندى اقپارات بەرىپ وتىرادى. حالىققا قىزمەت كورسەتۋ ورتالىعىنىڭ 12-كابينەتىندە ورنالاسقان داعدارىس ورتالىعى تاڭعى توعىزدان كەشكى جەتىگە دەيىن جۇمىس ىستەيدى.

«تۇرمەدە جازاسىن وتەپ شىققان ادامدار مەملەكەتتىك قىزمەت تۇرلەرى، الەۋمەتتىك قولداۋ سالاسىنداعى مۇمكىندىكتەر، جۇمىسقا ورنالاسۋ ماسەلەلەرىندە ايتارلىقتاي قيىندىقتارعا كەزىگەدى. داعدارىس ورتالىعى وسى كەزدە ولارعا كومەككە كەلىپ، وسى ماسەلەلەردە بارىنشا تولىققاندى اقپارات الۋ مۇمكىندىگىن بەرەدى. بۇل ادامنىڭ قوعامعا الەۋمەتتەنۋىنە كوپ سەپتىگىن تيگىزەدى»، - دەيدى قاراعاندى وبلىستىق قىلمىستىق-اتقارۋ جۇيەسى دەپارتامەنتىنىڭ پروباسيا قىزمەتىندەگىلەر.

بالقاشتا 175 ادام پروباسيالىق ەسەپتە تۇرادى، ونىڭ جەتەۋى راقىمشىلىق بويىنشا بوساپ شىققاندار. بۇدان بولەك، وڭىردە العاش رەت مەملەكەتتىك الەۋمەتتىك تاپسىرىس اياسىندا «ادامدارعا مۇمكىندىك بەرىڭىز» اتتى جوبا جۇزەگە اسىرىلۋدا. سوتتالعان 4 مىڭ ادامنىڭ اربىرىمەن جەكە الەۋمەتتىك-قۇقىقتىق كومەك كورسەتۋ باعدارلاماسى جاسالىپ، ولاردىڭ بارلىعى تۇگەل ىسكە اسىرىلدى. بۇل جوبا بويىنشا قارجىلىق جانە باسقا دا كومەكتەر كورسەتىلەدى. وعان جەرگىلىكتى بيۋدجەتتەن 22 ميلليون تەڭگە قارجى ءبولىندى.