پرەمەر-مينيستر ەريەۆان قالاسىندا (ارمەنيا) وتكەن ەۇاك جۇمىسىنا قاتىسقاننان كەيىن اقتاۋعا ۇشىپ كەلدى. بۇل تۋرالى Qamshy.kz اقپارات اگەنتتىگى ق ر پرەمەر-مينيسترى باسپا ءسوز قىزمەتىنە سۇيەنە وتىرىپ جازادى. 

باقىتجان ساعىنتايەۆ جۇمىس ساپارى اياسىندا ءوڭىردىڭ جۇرتشىلىعىمەن جانە اكتيۆىمەن وبلىستى دامىتۋدىڭ وزەكتى ماسەلەلەرى بويىنشا، سونىمەن قاتار «اتامەكەن» ۇكپ وڭىرلىك كەڭەسىنىڭ مۇشەلەرىمەن شاعىن جانە ورتا بيزنەستى دامىتۋ ماسەلەسى بويىنشا كەزدەسۋ وتكىزەدى دەپ جوسپارلانعان.

بۇدان وزگە، ق ر پرەمەر-مينيسترى قۇرىق اۋىلىنداعى پاروم كەشەنىنىڭ جۇمىسىمەن جانە كەشەننىڭ ەكىنشى كەزەڭىنىڭ قۇرىلىس بارىسىمەن تانىسادى، ونىمەن قوسا الەۋمەتتىك ينفراقۇرىلىم نىساندارى مەن ونەركاسىپتىك كاسىپورىنداردى ارالايدى.

وبلىسقا كەلگەن بويدا، 25 قازان كۇنى كەشكە، باقىتجان ساعىنتايەۆ اقتاۋدىڭ شاعىن اۋداندارىنىڭ بىرىندە «جاڭا سەرپىن» وڭىرلىك باعدارلاماسىن ىسكە اسىرۋ اياسىندا تۇرعىزىلعان جاتاقحاناعا باردى. اتالعان باعدارلاما جاس مامانداردى تۇرعىن ۇيمەن قامتاماسىز ەتىپ، جۇمىسسىز حالىقتىڭ ەڭبەككە جۇمىلۋىنا جاردەمدەسۋگە باعىتتالعان.