جەلتوقسان ايىندا بىرنەشە مەرەكەنىڭ اتاپ وتىلەتىنى بەلگىلى. قازاقستان رەسپۋبليكاسى پرەزيدەنتىنىڭ كۇنى – 1 جەلتوقسان، ق ر تاۋەلسىزدىك كۇنى – 16 جەلتوقسان، قازاقستان رەسپۋبليكاسىنىڭ دەموكراتيالىق جاڭارۋ كۇنى – 17 جەلتوقسان، سونداي-اق جاڭا جىل. اتالمىش مەرەكەلەرگە وراي الماتى اكىمدىگى تاراپىنان جوسپارلانعان دايىندىق بارىسىن ءبىلۋ ماقساتىندا Qamshy.kz اقپارات اگەنتتىگىنىڭ ءتىلشىسى اكىمدىككە ساۋال جولداعان ەدى.

الماتى اكىمدىگى باسپا ءسوز قىزمەتىنىڭ مالىمەتىنشە، مەرەكەلەردىڭ كۇن ارالىعى بىر-بىرىنە جاقىن بولعاندىقتان، جوعارىدا اتالعان مەرەكەلەردىڭ تاقىرىپتارىن قامتيتىن قالانى بەزەندىرۋدىڭ بىرىككەن تۇجىرىمداماسى دايىندالادى. تۇجىرىمدامادا 1 جەلتوقساننان باستالاتىن بەزەندىرۋ ءۇشىن ۇلتتىق ءستيلدىڭ ەلەمەنتتەرى پايدالانىلماق.

2017 جىلى الماتى قالاسىنىڭ مادەنيەت جانە مۇراعاتتار باسقارماسى جەلتوقسان ايىنىڭ بارلىق مەرەكەلەرىنە وراي قالا بەزەندىرۋ ءۇشىن جەرگىلىكتى بيۋدجەتتەن 175 ميلليون تەڭگە بولگەن. ال 2016 جىلى 215 ميلليون تەڭگە ءبولىندى.

ق ر تاۋەلسىزدىك كۇنى مەرەكەسى اياسىندا الماتى قالاسىندا 2017 جىلدىڭ 15 جەلتوقسانىندا رەسپۋبليكا سارايىندا مەرەكەلىك جيىن مەن كەش وتەدى، سونداي-اق 16 جانە 17 جەلتوقساندا «تاۋەلسىزدىك» مونۋمەنتى مەن «تاۋەلسىزدىك تاڭى» ەسكەرتكىشتەرىنە گۇل شوقتارىن قويۋ شاراسى وتەدى. وسى ماقساتتا 2017 جىلى 26 ميلليون تەڭگە قارجى بولىنەدى، ال 2016 جىلى 31 ميلليون تەڭگە بولىنگەن.

قالا تۇرعىندارى مەن قوناقتارىنا جاڭا جىلدىق كوڭىل كۇي سىيلاۋ ماقساتىندا اۋدان اكىمدىكتەرىنە 429 ميلليون تەڭگە قارجى ءبولىندى. بۇل قارجىعا ماگيسترالدى كوشەلەردى عانا ەمەس، قالانىڭ 8 اۋدانىنىڭ كوشەلەرى مەن كوپىرلەرىن جالپى ۇزىندىعى 260 شاقىرىم بولاتىن گريلياندامەن، يلليۋميناسيالارمەن، 6800 ديزاين ەلەمەنتتەرىمەن بەزەندىرىلەدى، شاعىن ارحيتەكتۋرالىق نىساندار مەن كورنشتەيندەر ورناتىلادى.

ساتىپ الىنعان ديزاين ەلەمەنتتەرى كەلەسى جىلدارعا دا جارامدى ەكەنىن ەسكەرتتى. ياعني، قارجى شامامەن 10-15 جىلعا ۇنەمدەلەدى.

ال جاڭا جىلعا دايىندىق ق ر تاۋەلسىزدىك كۇنىنەن سوڭ ءبىراق باستالادى. مەرەكەنىڭ باستى شىرشاسى 18 جەلتوقسان كۇنى جاعىلادى.

سونىمەن قاتار الماتى قالاسى كاسىپورىندارى اراسىندا جاڭا جىلعا ەڭ ادەمى بەزەندىرۋ نوميناسياسى بويىنشا بايقاۋ ءوتۋ جوسپارلاندى.

سونداي-اق قالا اكىمدىگى جىل سايىن تۇرعىندار تاراپىنان ۆانداليزم فاكتىلەرىنە تاپ بولىپ جاتاتىنىن ءمالىم ەتتى. شىرشا ويىنشىقتارى ۇرلانىپ، شاعىن ارحيتەكتۋرالىق نىساندار قيراتىلادى. وندايدا كەيبىر بەزەندىرۋ شارالارى ءساتسىز اياقتالىپ، جوندەۋ جۇمىستارىنا قايتا كىرىسۋگە تۋرا كەلىپ جاتادى.