ورتا سالماقتاعى WBA (Super)، IBO، WBC جانە IBF بەلبەۋلەرىنىڭ يەگەرى قازاقستاندىق بوكسشى گەنناديي گولوۆكيننىڭ (37-0-1، 33 كو) پروموۋتەرى توم لەففلەر RingTV ارناسىنا بەرگەن سۇقباتىندا وتانداسىمىزدىڭ 2018 جىلعى جوسپارلارى تۋرالى ايتىپ بەردى، دەپ حابارلايدى
Qamshy.kz اقپارات اگەنتتىگى Vesti.kz مالىمەتىنە سۇيەنىپ.

"مەنىڭ ويىمشا، ءبىز كەلەر جىلى ءۇش كەزدەسۋ وتكىزەمىز. گولوۆكين الدىمەن مامىر ايىندا، سودان سون قىركۇيەك جانە جەلتوقسان ايىندا جەكپە-جەك وتكىزەتىن شىعار. ارينە، مامىردا ءبىز "كانەلومەن" ەكىنشى رەت كەزدەسۋدى ويلاستىرىپ وتىرمىز. بۇل ءبىزدىڭ باستى ماقساتىمىز. سونىمەن قاتار گولوۆكيننىڭ كارەراسى ءبىر ورىندا تۇرىپ قالماۋ ءۇشىن قوسالقى جوسپارىمىز دا بار. 

"كانەلونى" ماڭگىلىك كۇتە بەرمەيمىز. ەگەر ول جەكپە-جەك وتكىزۋگە كەلىسىم بەرمەسە، گولوۆكيننىڭ كەزدەسۋىن قابىلدايتىن سپورت كەشەندەرى بار. مەندە قوسىمشا جوسپار دا بار. ول كەزدە GGG دجەيكوبسپەن ەكىنشى رەت كەزدەسۋى مۇمكىن"، - دەيدى لەففلەر. 

ايتا كەتەيىك، گولوۆكين ءوزىنىڭ سوڭعى كەزدەسۋىن 16 قىركۇيەك كۇنى لاس-ۆەگاس قالاسىندا مەكسيكالىق ساۋل "كانەلو" الۆارەسكە (49-1-2، 34 كو) قارسى وتكىزدى. 12 راۋندتىڭ قورىتىندىسى بويىنشا، تورەشىلەر تەڭ ناتيجەنى تىركەدى. وسىلايشا قازاقستاندىق بوكسشى وزىنە تيەسىلى بارلىق بەلبەۋلەرىن ساقتاپ قالدى. ال ولاردىڭ ەكىنشى كەزدەسۋى 2018 جىلدىڭ 5 مامىرىندا ءوتۋى مۇمكىن.